Almatydaǵy sel: 19 000 tekshe metrge jýyq turmystyq qaldyqtar, laı úıindileri shyǵaryldy

Bul týraly búgin Almaty ákiminiń baspasóz qyzmetinen habarlady.

«Sońǵy táýlikterde, ıaǵnı 23-26 shilde aralyǵynda Alataý aýdanynda 5000 tekshe metr, Áýezov aýdanynda 1000 tekshe metr, al Naýryzbaı aýdanynda 12 690 tekshe metrden astam qatty turmystyq qaldyqtar men laı jáne tas úıindileri shyǵaryldy. Sonymen qatar, Qaraǵaıly ózeni arnasynyń 1,5 shaqyrym jeri tazartyldy. Al sel tasqyny saldarynan ózenniń 7 shaqyrym jeri buzylǵan bolatyn», - delingen málimdemede.

Sońǵy eki táýlik ishinde gýmanıtarlyq kómek aıasynda 53 tonnadan astam aýyz sý, 3700 - qap, 1170 - kúrek, 600 - jup qolǵap, 857 - rezeńke etik jetkizildi. 5000-nan astam adam ystyq tamaqpen qamtamasyz etildi.

Qazirgi tańda apattyq-qutqarý jumystaryna aýmaqtyq memlekettik organdardyń, TJ boıynsha komıtettiń, Almaty q. ІІD bólimsheleri, «Almaty qalasynyń qutqarý qyzmeti» kásiporyny, QR ІІM Ulttyq gvardııasy, QR QM Almaty garnızonynyń áskerı bólimsheleri, Azamattyq qorǵanys qyzmeti jáne eriktiler tartylǵan.

Barlyǵy 1758 adam men 352 tehnıka jumyldyrylyp otyr.

Sel tasqyny barysynda 1036 adam evakýatsııalandy. Olardyń ishinde 51 bala bar. 484 adam qonaq úılerge jaıǵastyryldy. Sel tasqynynan 101 adam qutqaryldy. Olardyń ishinde 24 bala bar. 120 adamǵa medıtsınalyq jáne psıhologııalyq kómek kórsetildi.

Aldyn ala derekter boıynsha, 456 úı zaqymdandy. Olardyń ishinde 9 úı qıraǵan. 44 kóshe men 32 avtokólik laı kóshkininiń astynda qaldy.

Qazirgi tańda Almaty qalasynyń tótenshe jaǵdaılar departamentiniń jedel shtaby men Naýryzbaı aýdany ákimdigine kómek surap 700-den astam júgindi.

Ázirge oqıǵa ornynda úsh komıssııa jumys istep jatyr. Olar: TJ saldaryn joıý, TJ saldaryn anyqtaý jáne turǵyn úılerdiń jaramdylyǵyna baǵa berý komıssııalary.