Almatydaǵy «Saıaly» yqsham aýdanynda bıyl 2138 páter turǵyndardy qabyldaıdy - A. Mapaev
ALMATY. QazAqparat - Almaty qalasynyń Alataý aýdanynda jańadan salynyp jatqan 3270 páterlik «Saıaly» yqsham aýdanynyń bes qabatty 63 turǵyn úıi, ıaǵnı 2138 páteri bıyl paıdalanýǵa beriledi. Páterlerdiń sharshy metri - 120 myń teńgeden esepteldi. Bul týraly búgin Almatyda jýrnalısterge bergen suhbatynda Almaty qalasy Qurylys basqarmasy basshysynyń orynbasary Asqar Mapaev málimdedi.
«Saıaly» yqsham aýdanynyń qurylysyna negizinen qazaqstandyq materıaldar qoldanylyp jatyr. Bul temir betondy bes qabatty turǵyn úıler. Jer jaǵdaıyna baılanysty olardyń bıiktigin bes qabattan asyrýǵa bolmaıtyn boldy. Degenmen, bul turǵyn úıler 9 balldyq jer silkinisine tótep bere alady», - dedi A. Mapaev.
Sonymen qatar, ol bıyl 63 turǵyn úıdiń qurylysy aıaqtalyp, 2138 páterdiń turǵyndarǵa beriletindigin jetkizdi.
«Qazir 68 turǵyn úıdiń qurylysy júrip jatyr. Qalǵan úılerdiń qurylysy kelesi jyly bastalady. Al bıyl, naqty 63 turǵyn úı paıdalanýǵa beriledi. ıAǵnı, 2138 páterdiń kilti ıelerine tabys etiledi. Turǵyn úılerde páterler 1, 2 jáne 3 bólmeli bolyp keledi. Bir bólmeli páterdiń aýdany - 45-50 sharshy metr, eki bólmeli páter - 50-60 sharshy metr jáne úsh bólmeli páterdiń aýdany - 78-80 sharshy metrdi quraıdy. Bul páterlerdiń barlyǵy úsh baǵyt boıynsha taratylady. Birinshiden, jergilikti ákimdikterde turǵyn úı kezeginde turǵan azamattarǵa jaldamaly baspana retinde 614 páterlik 21 turǵyn úı beriledi. Jalpy aýmaǵy - 37,16 myń sharshy metr. Ekinshiden, jas otbasylarǵa 12 turǵyn úı beriledi. Jalpy kólemi - 22,27 myń sharshy metr nemese 396 páter. Úshinshiden, Almaty qalasynyń oblıgatsııalyq zaımynan túsken qarjyǵa salynǵan 30 turǵyn úı «Turǵynúı Qurylys Jınaq banki» arqyly ıpotekalyq júıe boıynsha taratylady. Jalpy kólemi - 65,01 myń sharshy metr nemese 1 128 páter. Páterlerdiń sharshy metri - 120 myń teńgeden esepteldi», - dedi A. Mapaev.
