Almatydaǵy saýda úıleriniń birine jarylǵysh zat qoıyldy degen anonımdi habar jalǵan bolyp shyqty
ASTANA. 2 sáýir. QazAqparat - Almatydaǵy «Alma» saýda úıine jarylǵysh zat qoıyldy degen anonımdi habar jalǵan bolyp shyqty. Bul aqparatty QR TJM baspasóz qyzmeti taratyp otyr.
Vedomstvonyń naqtylaı túsýinshe, qalalyq ishki ister departamentine juma kúni saǵat 16:46-da atalǵan saýda úıi ǵımaratyna jarylǵysh zat qoıylǵandyǵy týrasynda anonımdi aqparat kelip túsken. Tótenshe oqıǵanyń aldyn alýǵa shuǵyl áreket etý qyzmeti, onyń ishinde QR TJM Almaty qalalyq tótenshe jaǵdaılar departamentiniń jeke quramyndaǵy 5 maman men 2 tehnık jumyldyrylǵan. Oqıǵa ornynan 649 adam qaýipsiz jerge kóshirilgen.
«Arnaıy júrgizilgen is-sharalar barysynda jarylǵysh zat tabylǵan joq», - delingen baspasóz habarlamasynda.
