Almatydaǵy reıd: 90 nysan karantın talabyn buzǵan
ALMATY. QazAqparat – Almaty ákimi Baqytjan Saǵyntaevtyń tapsyrmasymen birqatar saýda nysandaryna reıd júrgizildi. Onda karantın talaptarynyń saqtalýy tekserildi, dep habarlaıdy QazAqparat tilshisi.
Tekserý kezinde karantın erejelerin saqtamaǵan nysandar anyqtaldy. Máselen, «Kók bazarǵa» kireberiste teplovızordyń joqtyǵy, satyp alýshylar arasynda áleýmettik qashyqtyqtyń saqtalmaýy, saýda zaldarynda sanıtaızerlerdiń bolmaýy anyqtaldy. Kelýshilerdi bir jolmen kirgizý usynyldy.
«Kók bazardy» basqaratyn «Kompanııa Dostar Kommerts» JShS-ǵa qatysty anyqtalǵan kemshilikter boıynsha QR Ákimshilik quqyq buzýshylyq týraly kodekstiń 462-baby 3-bóligimen hattama toltyryldy. Ákimshilik aıyppul salý úshin materıaldy sotqa berý tapsyryldy.
«Budan bólek, aýmaǵy 500 sharshy metrden asatyn nysandardyń jumysyna shekteý qoıylǵanyna qaramastan, monıtorıngilik tekserý kezinde «Sıtı Tsentr» saýda ortalyǵynyń úshinshi qabatynda ornalasqan, aýmaǵy 700 sharshy metrden asatyn jalǵa alynǵan dúkenniń jumys istep jatqany anyqtaldy. Sol sebepti Taýarlar men kórsetiletin qyzmetterdiń sapasy men qaýipsizdigin baqylaý aýdandyq basqarmasynyń basshysyna tıisti sharalardy qolǵa alý tapsyryldy», — dedi J.Bekshın.
«Kerýen» jáne «Aqbulaq» bazarlarynyń jumysyn baǵalaýda sanıtarlyq erejelerdiń talaptarǵa saı emestigi jáne tıisti qaýipsizdikti qamtamasyz etý múmkindiginiń joqtyǵy anyqtaldy. Taǵy bes bazardyń basshylaryna eskertý jasalyp, 1 maýsymǵa deıin bazardy tártipke keltirý usynyldy.
«Juldyz», «Jańa bulaq» JShS, «Tastaq» JShS «Tastaq» bazary men «Kók bazardyń» QR bas memlekettik sanıtarlyq dárigeriniń qaýlysyna sáıkes, jumys istemeı jatqany belgili boldy. Olar azyq-túlik bazarlarynyń jumys algorıtmi talaptaryn oryndamaǵan.
Sonymen qatar, «Skıf Treıd» JShS «Small» sýpermarketi, «Belyı veter-KZ» JShS saýda nysandarynda maska taǵý men dezınfektsııa rejımi saqtalmaǵan, kelýshiler arasynda keminde eki metr áleýmettik qashyqtyqty saqtaý talaptarynyń da oryndalmaǵany anyqtaldy.
Búgingi tańda monıtorıngilik toptar 3 myńǵa jýyq nysandy tekserip, onyń ishinde 93-i karantın talaptaryn buzǵanyn anyqtady.
Al jumystaryn zańsyz júrgizip otyrǵan nysandarǵa olardyń qyzmetin toqtatý sharasy qoldanyldy.
Aıta keteıik, 25 mamyrdan bastap aýdany 500 sharshy metrden asatyn saýda oryndaryna jumys isteýge ruqsat etildi. Olardyń qatarynda tamaqtaný oryndary men qonaqúıler bar.
