Almatydaǵy respýblıkalyq tájirıbelik konferentsııada dinı bilim berýdi jetildirý máseleleri talqylanýda (FOTO)

«Nur Múbárak» ýnıversıtetinde ótip jatqan bul sharaǵa Qazaqstan musylmandary dinı basqarmasynyń tóraǵasy, Bas mýftı Erjan qajy Malǵajyuly, «Nur Múbárak» ýnıversıtetiniń rektory, professor, doktor Jýda Abdýlǵanı Basıýnı, din isteri komıtetiniń basshylary, medreselerdiń dırektorlardy, dinı saýat ashý kýrstarynyń ustazdary, dintanýshy-ǵalymdar, ımamdar, medrese shákirtteri qatysýda.

«Búgingi konferentsııada medreselerdi kolledj deńgeıine kóterý, dinı bilim berýdi jetildirý, ımamdardyń biliktiligin arttyrý, jastardy jat aǵymdardyń yqpalynan saqtandyrý máseleleri talqylanady. Osy konferentsııanyń sońynda «Qazaqstan musylmandary dinı basqarmasynyń 2020 jylǵa deıingi bilim berýdi damytý Tujyrymdamasy» atty tuńǵysh ret tarıhı qujat qabyldanaıyn dep otyr. Bul Tujyrymdama ımamdarymyzǵa, ustazdarymyzǵa úlken jaýapkershilik júkteıdi. Búgingi tańda Qazaqstan boıynsha 751 meshitte saýat ashý kýrstary júrgizilip jatyr. Bıylǵy jyldyń ózinde olarda 48 myń adam bilim alyp shyqty. Ózderińiz bilesizder, kezinde mynaý jastarymyzdyń túrli radıkaldy toptarǵa ketýi ózimizdiń dástúrli dinimizdi tereńirek túsinbegenniń saldarynan oryn aldy dep aıtýǵa bolady. Osy maqsatta jastarymyzǵa dástúrli dinimizdi úıretýde bul Tujyrymdamanyń mańyzy zor dep aıtýǵa bolady», - dedi óz sózinde Bas múftı Erjan qajy Malǵajyuly.

Aıta ketelik, Tujyrymdama - dinı bilim berý júıesi boıynsha baǵyt-baǵdarymyzdy aıqyndaıtyn basty strategııalyq qujat bolmaq. Tujyrymdamany qabyldaýdaǵy basty maqsat - jastarǵa, jalpy jurtshylyqqa tolyqqandy, sapaly, básekege qabiletti dinı bilimdi, zaıyrly bilimmen qosa, ulttyq qundylyqtarymyzben sabaqtastyra otyryp túsindirý jáne ony jetildirý. Sondaı-aq, jastardy dinı ekstremızm men radıkaldy aǵymdardan saqtandyrý.

Konferentsııa jumysy odan ári jalǵasýda.