Almatydaǵy Respýblıkalyq sport kolledji janyndaǵy mektep-ınternat qaıta ashyldy
ALMATY. QazAqparat – Almatydaǵy Respýblıkalyq sport kolledji janyndaǵy mektep-ınternat qaıta ashyldy. Bul týraly QR Mádenıet jáne sport mınıstri Ashat Oralov Facebook paraqshasynda jazdy, dep habarlaıdy QazAqparat tilshisi.
Ashat Oralovtyń sózinshe, Mınıstrlikke kelip túsken túıtkildi máselelerdiń ishinde – Almatydaǵy «Respýblıkalyq sport kolledji» janyndaǵy mektep-ınternattyń jumysyn qaıta jandandyrýǵa qatysty ata-analar men ustazdar tarapynan túsken ótinishter mańyzdy bolýda.
«2022 jyly atalǵan oqý orny jabylyp, daryndy oqýshylar, jattyqtyrýshylar men ustazdar basqa bilim berý uıymdaryna jiberilgen edi. Máseleni birden tikeleı óz baqylaýyma aldym. Atalǵan oqý ornynyn túlekteri – Dáýlet Turlyhanov, Olga Shıshıgına, Islam Baıramýkov sııaqty belgili sportshylarymyz. Sondyqtan da bul mekteptiń bazasy men myqty oqytýshylary áli de kóptegen talantty sportshylardy daıarlaıtyny sózsiz. Sol sebepti mektepti jabý týraly sheshim qaıta qarastyryldy», - dep jazdy Ashat Oralov.
Ol sondaı-aq bilim ordasy búginde oqýǵa qujattar qabyldaýdy bastap, oǵan júzdegen bala qabyldanyp, ondaǵan kásibı oqytýshy men jattyqtyrýshy jumyspen qamtylatynyn habarlady.
«Mınıstrlik lıtsenzııany qaıtarý boıynsha aýqymdy jumys júrgizdi. Búginde bilim ordasy oqýǵa qujattar qabyldaýdy bastap ketti. Mektepke júzdegen bala qabyldanyp, ondaǵan kásibı oqytýshy men jattyqtyrýshy jumyspen qamtylady. Internattyń daıyndyq jumystaryn kórip, oqý kabınetteriniń jabdyqtalýyn, kitaptarmen qamtylýyn, jataqhanadaǵy oryndardyń jaı-kúıimen tanysý úshin arnaıy bardym. Sonymen birge, muǵalimderdiń tizimi, sabaq kestesi men kún tártibi bekitildi», - dedi Mádenıet jáne sport mınıstri.
Onyń málimetinshe, mınıstrlik úshin balalar múddesi – birinshi orynda.
«Búginde Memleket basshysy balalar sportyn damytýǵa aıryqsha nazar aýdaryp otyr. Bizdiń mınıstrlik úshin de balalar múddesi – birinshi orynda. Bolashaq búginnen bastalatynyn eskersek, el mereıin asyrar erteńgi chempıondarymyzǵa qajetti jaǵdaıdy dál qazir jasaýǵa tıispiz», - dep jazdy Mádenıet jáne sport mınıstri Ashat Oralov.
Eske salsaq, ótken jyly Almatydaǵy sport kolledji jabylady dep sheshim qabyldanǵan. Osyǵan qatysty Mádenıet jáne sport mınıstrligi resmı túsinik bergen bolatyn.
Keıin Mádenıet jáne sport mınıstri bolǵan Dáýren Abaev Almatydaǵy Respýblıkalyq sport kolledji jabylmaıtynyn málimdegen edi.Foto: facebook.com/Ashat Orlanov
