Almatydaǵy Respýblıkalyq sport kolledji jabylmaıdy - Dáýren Abaev
Mınıstr kolledjde bilim alýshy balalar, ata-analary men jattyqtyrýshylary oqý orny jabylyp qala ma dep alańdaýly ekenin jaqsy biletinin jazdy.
«Sol sebepti ótken juma kúni Almatydaǵy respýblıkalyq mańyzy bar mektep-ınternattardy damytý máseleleri boıynsha keńes ótkizdik. Jıynǵa sporttyq bilim berý uıymdarynyń dırektorlary shaqyryldy. Ashyq ári syndarly áńgime nátıjesinde biz birlese sheshimge keldik.
Sonymen, kolledj ornyna ashylýy tıis Jattyqtyrý ortalyǵy endi sol bilim ordasynyń janynda ashylady.
Ortalyq jyl boıy úzdiksiz jumys istep, sporttyq mekemelerdiń qadamyna oń serpin berýi kerek. Munda talantty sportshylarymyz óziniń sporttyq mansabyn ári qaraı jalǵastyrýǵa múmkindik alady. Mekeme keshendi ǵylymı toptyń qatysýymen ozyq halyqaralyq tájirıbege súıene otyryp qurylady.
Odan bólek, 2022-2023 oqý jylynda birinshi kýrs stýdentterin qabyldaý kezinde irikteý jumystaryn muqııat júrgizýdi tapsyrdym»,- dep jazdy Dáýren Abaev.
Sondaı-aq, mınıstr kolledj janynan ashylǵan tájirıbelik synyptardyń «Kárken Ahmetov atyndaǵy olımpıada rezerviniń respýblıkalyq mamandandyrylǵan mektep-ınternat-kolledji» RMM men «Olımpıada rezerviniń respýblıkalyq mamandandyrylǵan mektep-ınternat-kolledji» RMM-ne aýysatynyn málim etti.
«2011 jyly kolledj janynan ashylǵan tájirıbelik klastarǵa keletin bolsaq, bul synyptarda oqyǵan balalar sapaly sporttyq bilim alyp, materıaldyq bazasy standartqa saı oqý ornynda sportpen shuǵyldanýy tıis.
Sondyqtan atalǵan synyptar «Kárken Ahmetov atyndaǵy olımpıada rezerviniń respýblıkalyq mamandandyrylǵan mektep-ınternat-kolledji» RMM men Almaty qalasy Shańyraq yqsham aýdanyndaǵy «Olımpıada rezerviniń respýblıkalyq mamandandyrylǵan mektep-ınternat-kolledji» RMM-ne aýysady», - dep jazdy Mádenıet jáne sport mınıstri Dáýren Abaev.
