Almatydaǵy Prezıdent rezıdentsııasyn súrý jumystary is júzinde aıaqtaldy - Erbolat Dosaev

ALMATY. QazAqparat – Almatydaǵy qańtar oqıǵasy kezinde órtenip ketken Prezıdent rezıdentsııasyn súrý jumystary is júzinde aıaqtaldy. Al, qala ákimdiginiń ǵımaraty kelesi jyldyń naýryz aıyna deıin qalpyna keltiriledi. Bul týraly shahar basshysy Erbolat Dosaev Bostandyq aýdanynyń turǵyndarymen kezdesý kezinde aıtty, dep habarlaıdy QazAqparat tilshisi.

«Prezıdent rezıdentsııasyn súrý jumystary is júzinde aıaqtaldy. Jaqynda men Memleket basshysyna qaladaǵy jańa saıabaqtyń tujyrymdamasyn usyndym. Ol ádemi, jaqsy qalalyq saıabaq bolady. Al, qala ákimdigi ǵımaratyn kelesi jyldyń naýryz aıynyń sońyna qaraı qalpyna keltirsek dep otyrmyz. Osyǵan baılanysty aldaǵy ýaqytta qalada erkin túrde qaıtadan ákimdik jınalysyn ótkizetin bolamyz dep oılaımyn. Qazir bizdiń basqarmalar ártúrli jerde otyr. Jalpy, biz olarmen birlesip 1 aqpannan bastap jumys istemedik», - dedi Erbolat Dosaev.

Sondaı-aq, Erbolat Dosaev Respýblıka alańynda ornalasqan ǵımarattarǵa qatysty oıyn aıtty.

«Alańdaǵy ǵımarattar – jekemenshiktegi ǵımarattar. Olardyń ıeleri basqalar sekildi ǵımarattardy qalpyna keltirýge kúsh salady dep kútemiz. Olardyń ishinde jóndeý jumystary bastalǵanyn bilemin», - dep atap ótti qala basshysy.

Eske salsaq, buǵan deıin Erbolat Dosaev Almaty ákimdigi ǵımaratyn jóndeý jumystary 2023 jyly aıaqtalatynyn aıtqan bolatyn.

Sondaı-aq, Memleket basshysy Qasym-Jomart Toqaev sheshimimen Almaty qalasyndaǵy Prezıdenttiń qyzmettik rezıdentsııasy súrilip, onyń ornyna jańa saıabaq salynatyny habarlanǵan.