Almatydaǵy perzenthanadan bala urlaǵan adam ustaldy
ALMATY. 23 qarasha. QazAqparat /Názıra Eleýhan/ - 20 qarasha, senbi kúni Almatydaǵy №1 perzenthanadan urlanǵan bala tabyldy. Ony urlaǵan 25 jastaǵy áıel Almaty qalasy Áýezov aýdanynyń turǵyny bolyp shyqty. Ol búgin tańerteń saǵat 3-te ustalyp, qamaýǵa alyndy. Bala urlaǵan áıel 7 jyldan 12 jylǵa deıin bas bostandyǵynan aıyrylýy múmkin.
"Áıel perzenthanaǵa ońaı kirip, úı halatyn kıip, dárigerlerdiń aýysatyn ýaqytynda, balany urlap ketken. Buǵan deıin, ol 2007 jyly osy jerde bosanǵandyqtan barlyq kirip-shyǵý joldaryn, dárigerlerdiń jumys ýaqytyn da bilgen. Ustalǵan áıeldiń aıtýynsha, ol balany ózi asyrap alý úshin urlaǵan.
"9 aı boıy kúıeýimdi aıaǵym aýyr dep aldadym, bul sharaǵa otbasyn saqtaý úshin bardym", degen ol jaýap alý barysynda. Áıeldiń aıtýynsha, ol bala urlaýdy aldyn ala josparlaǵan. Bul áńgimeniń qanshalyqty shyndyq ekendigin aldaǵy tekserý jumystary kórsetetin bolady",-dedi Almaty qalasy ІІD-niń krımınaldy polıtsııa basqaramasynyń bastyǵy, polıtsııa polkovnıgi Amangeldi Shiderqulov.
Onyń aıtýynsha, sol kúni dabyl boıynsha Almaty polıtsııasynyń barlyq quramy aıaǵynan tik turǵyzylǵan. "Oqıǵa kishkentaı sábıge baılanysty bolǵandyqtan, bala ómirine ár mınýtta qaýip tónip turdy. Almaty qalasy ІІD-niń basshyly general-maıor Erlan Turǵymbaevtyń jetekshiligimen 12 arnaıy tekserý toby quryldy. Quramǵa eń tájirıbeli polıtsııa qyzmetkerleri tartyldy. Bul keń aýqymdy izdeý jumystaryn elimizdiń ishki ister mınıstri óz baqylaýyna aldy",- dedi Amangeldi Shiderkýlov.
