Almatydaǵy pedıatrııa jáne balalar hırýrgııasy ortalyǵynda asa aýyr otalar jasalady
ALMATY. QazAqparat - Almatyda Pedıatrııa jáne balalar hırýrgııasy ortalyǵy 85 jyldyǵyn atap ótti. Balalar densaýlyǵyna 85 jyl úzdiksiz talmaı qyzmet etip kele jatqan ortalyq qyzmetkerleri búgin elimizdegi barlyq bilikti balalar dárigerlerimen bas qosyp, alqaly jıyn ótkizdi, dep habarlaıdy QazAqparat tilshisi.
«Bizdiń Ortalyq respýblıkamyz boıynsha barlyq balalarǵa medıtsınalyq kómek kórsetetin elimizdegi kóne medıtsınalyq uıymdardyń biri, bul jerde joǵary bilikti mamandar dáriger-pedıatrlar, bala hırýrgteri, ǵylymı qyzmetkerler, bilikti meıirbıkeler qyzmet etedi. Pedıatrııa jáne balalar hırýrgııasy ǵylymı ortalyǵynyń Ana men náresteler ınstıtýty bolyp negizi qalanǵan sátten bastap, zamanaýı dıagnostıkalyq jáne emdeý jabdyqtarymen jaraqtalǵan qazirgi Ǵylymı ortalyqqa deıin damyǵan úlken tarıhy bar. Biz barlyǵymyz osyndaı Ortalyqta jumys isteýge múmkindigimizdiń bolǵanyn jáne pedıatrııalyq qyzmettiń negizin qalaǵan ustazdarymyzdyń isin jalǵastyrý jolyndaǵy úlesimizdi maqtan etemiz», - dedi quttyqtaý sóz sóılegen atalǵan ortalyq dırektory Rıza Boranbaeva.
Ortalyqtyń 85 jyldyǵyna arnalǵan saltanatty jıyn aıasynda qazaq balalar hırýrgııasynyń atasy Kamal Ormantaev, akademık Tóregeldi Sharmanov, medıtsına ǵylymdarynyń doktory, professor Tamara Chývakova syndy tanymal dárigerler qatysqan elimizdegi pedıatrııalyq qyzmettiń baǵyt-baǵdaryna arnalǵan konferentsııa ótti.
Konferentsııada pedıatrııanyń ózekti máseleleri, onkologııalyq, gematologııalyq kómek berýdi uıymdastyrý, zerthanalyq qyzmettiń, balalar kardıohırýrgııasy qyzmetiniń damýy, onkologııalyq aýrýlarǵa shaldyqqan balalardy ońaltýdyń búgingi jaǵdaıy syndy balalardy emdeýdegi ózekti máseleler talqylandy.
«QazAqparat» tilshisiniń suraqtaryna jaýap bergen atalǵan ortalyqtyń hırýrgııa bólimi basshysy, medıtsına ǵylymdarynyń doktory Nurlan Aqparov elimizde balalar arasyndaǵy keń taralyp otyrǵan dertterdi aıtyp berdi.
«Bizdiń ortalyqta Qazaqstandaǵy eń aýyr naýqasqa shaldyqqan balalardy emdeıdi. Sonyń ishinde, kóp kezdese bermeıtin aýrýǵa shaldyqqan balalardy, týa bitken naýqas balalardy da qaraıdy. Bizdiń ortalyqta otalardyń barlyq túri jasalady. Ortalyqtaǵy hırýrgııa bólimi 1994 jyly akademık Kamal Ormantaevtyń jetekshiligimen ashyldy dese bolady. Mine, sodan bastap, 3-4 jyl saıyn onyń salalyq jaǵyn keńeıttik. Búginde neontaldy, kardıo, ýrologııalyq hırýrgııa sekildi bólimsheleri qyzmet etip jatyr. Sońǵy úsh jylda onkologııa hırýrgııasy ashyldy. «Tikishek tesigi» degen óte aýyr naýqaspen túsetin balalar bar. 2004 jylǵa deıin osy dıagnozben kelgen balalardyń 95 paıyzy óte qıyn ota jasalǵanymen, múgedek bolyp qalatyn edi. 2004 jyly men TMD elderindegi dárigerler arasynda birinshi bolyp, AQSh-tan tájirıbe aldym. Qazir osy aýrýǵa qatysty eń qıyn otalardy ózimizde jasaıtyn boldyq. Qazir osy naýqaspen túsken balalardyń 15 paıyzy ǵana múgedek retinde qalsa, qalǵany jazylyp, ómirge aralasyp ketip jatyr», - dedi Nurlan Aqparov.
Nurlan Aqparov táýelsizdigimizdiń arqasynda mamandar shetelden bilim alyp kelip aýyr naýqastardy emdep jatqanyn maqtanyshpen aıtty.
«Táýelsizdiktiń arqasynda jastarymyz, mamandarymyz shetelge baryp bilim alyp kelip, otandyq medıtsınanyń damýyna atsalysyp jatyr. Keńes úkimeti kezinde tek Máskeý men Lenıngradtan tájirıbeden ótetin. Árıne, ol kezde medıtsına myqty boldy. Degenmen, qazir medıtsınanyń aýqymy keńidi, keńirek qaraıtyn boldyq», - dedi ol.
Aıta keteıik, Pedıatrııa jáne balalar hırýrgııasy ortalyǵynyń negizi 1932 jyly 28 qarashada Ana men bala densaýlyǵyn qorǵaý ǵylymı zertteý ınstıtýty retinde qalanǵan. Atalǵan ortalyq balalardyń densaýlyǵyn qorǵaýda qol jetkizgen jetistikteri úshin Halyqtar Dostyǵy ordenimen jáne «Sapa úshin Eýropalyq Gran Prı» halyqaralyq baıqaýynyń «Medıtsına salasynyń kóshbasshysy» Bas júldesimen marapattalǵan.
Foto:www.pediatria.kz
