Almatydaǵy Pedıatrııa jáne balalar hırýrgııasy ǵylymı ortalyǵy 85 jyldyǵyn atap ótti
ALMATY. QazAqparat - Qazaqstan pedıatrlary almatylyq «Pedıatrııa jáne balalar hırýrgııasy ǵylymı ortalyǵy» mekemesin mereıtoıymen quttyqtady, dep habarlaıdy QazAqparat.
Ortalyq 85 jyl boıy balalar men jańa týǵan nárestelerge teńdessiz hırýrgııalyq operatsııalardy júzege asyra otyryp, olarǵa qol ushyn sozyp keledi.
«Bizdiń ortalyq eń kúrdeli aýrýlardy emdeý isimen aınalysady. Balalar men jańa týǵan nárestelerdiń arasynda óte sırek kezdesetin aýrýlar bolady. Al munda hırýrgııalyq operatsııalardyń barlyǵy jasalady. Hırýrgııa bólimi 1994 jyly Kamal Ormantaevtyń jetekshiligimen ashylǵan bolatyn. Sol ýaqyttan beri biz osy salany damytyp keldik, sonyń arqasynda qazir ortalyqta ıntensıvti terapııa, ýrologııa men kardıohırýrgııa sııaqty bólimder jumys isteıdi»,-dedi Pedıatrııa jáne balalar hırýrgııasy ǵylymı ortalyǵynyń hırýrgııa bóliminiń meńgerýshisi, medıtsına ǵylymdarynyń doktory Nurlan Aqparov.
Saltanatty sharada balalar hırýrgııasyn damytý perspektıvalary men jetistikteri, balalardy ońaltýdyń qazirgi jaǵdaıy, pedıatrııa qyzmetiniń jańa tujyrymdamasyna qatysty máseleler sóz bolyp, densaýlyq saqtaý salasyna ólsheýsiz úles qosqan ortalyqtyń ardagerleri marapattaldy.
