Almatydaǵy Pedıatrııa ortalyǵynda «Aqyldy synyp» ashyldy
ALMATY. QazAqparat - Almatydaǵy Pedıatrııa jáne balalar hırýrgııasy ǵylymı ortalyǵynda ozyq qondyrǵylarmen jabdyqtalǵan «Smart School» oqý synyby ashyldy, dep habarlaıdy QazAqparat tilshisi.
Ortalyqta búgingi kúni 100-den astam bala em alýda. Innovatsııalyq oqý bólmesi ásirese, onkologııalyq dertke shaldyqqan balalarǵa oń áserin tıgizetini kórshi Reseı tájirıbesinen belgili.
Ortalyq dırektory Rıza Boranbaevanyń aıtýynsha, smart-synyp balalardyń emin úzbesten bilimderin arttyrýǵa, shyǵarmashylyq jaǵynan damytýǵa múmkindik beredi.
«Buǵan deıin kishkentaı patsıentterimiz barlyq pánder boıynsha palatalarynda bilim alsa, endi bilimderin osy synypta jalǵastyryp, bos ýaqyttaryn qyzyqty da tıimdi ótkizetin bolady. Erteńnen bastap sýret salý, konstrýktor quraý, aǵylshyn tilin úırený, shahmat úıirmeleri jumysyn bastaıdy. Bul óz kezeginde balalardyń tezirek jazylyp, saýyǵyp ketýine oń áserin tıgizedi dep senemiz», - dedi Rıza Boranbaeva.
Onyń aıtýynsha, bul synypta mýzyka men ertegilerdiń kómegimen terapııa seanstary ótkiziledi. Ortalyqqa kelip dáris beretin muǵalimder, sabaqtardy tıimdi jáne qyzyqty etip onlaın-rejimde de júrgize alady. Onlaın túrinde ótetin sabaqtarǵa endi tósekke tańylǵan balalar da qatysa alatyn bolady.
