Almatydaǵy órttiń barlyq nusqalary qaralyp jatyr – TJD basshysy
ALMATY. QazAqparat – Almaty qalalyq TJD basshysy Serik Áýbákirov qalada jaqynda bolǵan eki órtke qatysty túsinik berdi, dep habarlaıdy QazAqparat tilshisi.
Departament basshysynyń aıtýynsha, qalada eki órt keshe sóndirilgen. Kóktóbede shyqqan órt sóndirilgen soń 22 mınýt ótkende ekinshi órt týraly habarlama túsken.
Ekinshi qońyraýǵa shyqqanda órt sóndirýshiler er adamnyń múrdesin tapty.
«Ekinshi órttiń alǵashqy mınýttarynda órtengen jerdiń tómengi jaǵynda er adamnyń múrdesi tabyldy. Qazir polıtsııa onyń kim ekendigin anyqtap jatyr. Órttiń sebebin naqty aıta almaımyn. Bireý órtedi me álde joq pa? Ony polıtsııa anyqtap jatyr», - dedi Serik Áýbákirov.
Departament basshysynyń aıtýynsha, tilsiz jaý jekemenshik sektordy sharpýdyń az-aq aldynda bolǵan.
Aıta ketý kerek, keshe Kóktóbe bókterinde qurǵaq shı órtengen bolatyn. Ony sóndirýge birneshe tikushaq jumyldyryldy.
Oqıǵa bolǵan jerge kóp uzatpaı Almaty ákimi Baqytjan Saǵyntaev keldi.
Keıin arada birneshe mınýt ótken soń sol aımaqqa jaqyn jerde taǵy bir órt tutandy. Bul joly tilsiz jaý Dıvaev kóshesine jaqyn boldy.
Qyzyl jalyn 1 000 sharshy metr aýmaqty jaramsyz etken. Sol jerden órt sóndirýshiler ólgen adamnyń denesin taýyp aldy.
