Almatydaǵy órtti sóndirýge TJD-nyń jeke quramy túgel jumyldyryldy
ALMATY. QazAqparat - Almaty qalalyq Tótenshe jaǵdaılar departamentiniń basshysy Serik Áýbákirov Kóktóbeniń tómengi tusynda tutanǵan ekinshi órtti aýyzdyqtaý nelikten qıyn bolyp otyrǵanyn túsindirdi, dep habarlaıdy QazAqparat.
«Almaty qalasy garnızonynyń barlyq jeke quramy órttiń eń joǵary úshinshi dárejesi boıynsha kóterildi. Basymdyq turǵyn úı sektoryn qorǵaýǵa baǵyttalǵan. Jalyn tarap jatyr, onyń aýmaǵy ulǵaıýda. Túngi ýaqyttaǵy jumys qaýipsizdik tehnıkasyn saqtaýmen qıyndaı túsýde. Sebebi qýraıdyń bıiktigi keıde adamnyń boıyn jaýyp turady. Qazirgi ýaqytta órttiń taralýy toqtatyldy. Jeke oshaqtardy sóndirý júrgizilip jatyr», - dep jazdy ol Facebook-ta.
Eske salaıyq, jeksenbi kúni Kóktóbeniń bókterinde qurǵaq shóp órtengen bolatyn. Tótenshe jaǵdaıdy joıýǵa eki tikushaq jumyldyryldy. Sondaı-aq TJD-nyń 42 adamy men 9 tehnıkasy, «Almaty Tazalyq» MKK-nyń – eki jáne Almaty qalalyq Qutqarý qyzmetiniń bir sýarý tehnıkasy jumys istedi. QR ІІM Tótenshe jaǵdaılar komıtetiniń resmı ókili Nursultan Nurahmetov jalyn saǵat 19.58-de tolyǵymen óshirilgenin málim etti. Al Almaty qalalyq Tótenshe jaǵdaılar departamentiniń basshysy Serik Áýbákirov órttiń jeke sektorǵa aýysýynyń aldy alynǵanyn, departamenttiń jeke quramy kezekshilik atqarý úshin oqıǵa ornynda qalatynyn aıtty.
Sál keıinirek, S.Áýbákirov órt bolǵan birinshi aýmaqtan tómengi tusta taǵy bir oshaq tutanǵanyn jazdy. Qutqarýshylar tilsiz jaýmen kúres barysynda bir adamnyń denesin tapty. Onyń jynysy men tulǵasy anyqtalýda.
