Almatydaǵy Ortalyq memlekettik murajaı men Ulttyq kitaphanaǵa lańkester shabýyl jasaǵan - mınıstrlik

NUR-SULTAN. QazAqparat – Qazirgi ýaqytta mádenıet, arhıv, sport, týrızm nysandaryna keltirilgen shyǵyn kólemi eseptelip jatyr, dep habarlaıdy QazAqparat Mádenıet jáne sport mınıstrligine silteme jasap.

«Eldiń tarıhı-mádenı murasynyń tizimine engizilgen obektilerdiń jaǵdaıy, keltirilgen zalal týraly aqparat-naqtylanyp jatyr. Búkil el boıynsha tarıhı-mádenı mura eskertkishteriniń jaı-kúıine taldaý júrgizilýde.

Almatyda Qazaqstan Respýblıkasynyń ortalyq memlekettik murajaıy men QR Ulttyq kitaphanasyna lańkester shabýyl jasaǵan. Ǵımarattardyń terezeleri men kireberisi zaqymdanǵan, esikter synǵan, biraq qorlar men muraǵattar saqtalǵan. Qyzmetkerlerdiń batyldyǵynyń arqasynda bul nysandardyń basty múlkin tonaýǵa jol berilmedi», delingen habarlamada.

Vedomstvonyń málimetinshe, tarıhı-mádenı mura tizimine engizilgen nysandarǵa keltirilgen zalalǵa muqııat taldaý júrgizilip jatyr.