Almatydaǵy Ortalyq qalalyq klınıkalyq aýrýhanada koronavırýs ınfektsııasynyń oshaǵy aýyzdyqtaldy
ALMATY. QazAqparat –Almaty qalasy ákiminiń orynbasary Erjan Babaqumarov Ortalyq qalalyq klınıkalyq aýrýhana ujymymen beınekezdesý ótkizdi, dep habarlaıdy QazAqparat tilshisi.
Jıynǵa Qoǵamdyq densaýlyq saqtaý basqarmasy men Taýarlar men qyzmetterdiń sapasy men qaýipsizdigin baqylaý departamentiniń basshylyǵy qatysty. Kezdesýde Ortalyq qalalyq klınıkalyq aýrýhanaǵa ýaqytsha ornalastyrylǵan dárigerler men medıtsınalyq qyzmetkerlerdiń máselelerin sheshý joldary qarastyryldy.
Búginde aýrýhana aýmaǵyndaǵy koronavırýstyq ınfektsııanyń oshaǵy aýyzdyqtalyp, birinshi jáne ekinshi deńgeıde baılanys ornatqandar anyqtaldy. Ortalyq qalalyq klınıkalyq aýrýhananyń basshysy mindetin atqarýshy Marat Abdýllaev ótken táýlikte aýrýhana aýmaǵyndaǵy 316 tulǵadan analız ekinshi qaıtara alynǵanyn málimdedi.
Búgin taǵy 249 adam qaıta testileýden ótedi. Sonymen birge, aýrýhananyń bas dárigeri osyǵan deıin aıtylǵan usynystardyń eskerilgenin tilge tıek etti. Eń aldymen emhanada antıseptıkalyq jáne dezınfektsııalyq quraldar artyp, tamaqpen qamtamasyz etý máselesi de sheshimin tapty.
Jıynǵa oftalmologııa bóliminiń meńgerýshisi B. Joldasov, travmotologııa bóliminiń meńgerýshisi B. Erǵalıev, fızıoterapııalyq bólim meńgerýshisi A. Tórequlova, sonymen birge, QazMÚBBÝ travmotologııa jáne ortopedııa kafedrasynyń dotsenti K. Orazalıev pen «AGjPǴO» AQ táýelsiz dırektory, azamattyq belsendi A. Áljanova qatysty.
Qala ákiminiń orynbasary Erjan Babaqumarov COVID-19 test der kezinde alynyp, onyń nátıjesi ár adamǵa ýaqytyly berilý kerektiginiń mańyzdylyǵyn atap ótti. Nátıjesi teris shyqqan dárigerler men medıtsına qyzmetkerleri arnaıy daıyndalǵan qonaq úı keshenderine ınkýbatsııalyq kezeń aıaqtalǵanǵa deıin karantınge jatqyzylady.
«Aýrýhana qyzmetkerlerin qaıta tekserý jáne saraptama nátıjelerin qoldaryna berýge basymdyq berip otyrmyz», – dep atap ótti Erjan Babaqumarov.
Sondaı-aq, qala ákiminiń orynbasary Erjan Babaqumarov medıtsınalyq joǵary oqý oryndary basshylarynyń qatysýymen ótken kezdesýde medıtsınalyq uıymdarǵa bekitilgen dáriger-rezıdentterdiń eńbek qaýipsizdigin qamtamasyz etý máselelerin kóterdi. Búginde olardyń arasynda koronavırýs ınfektsııasyn juqtyrý jaǵdaılary tirkelgen. Atalǵan naýqastar qazir ınfektsııalyq statsıonarlarda em alýda. Bul rette naýqastarǵa qoldaý kórsetý, sonyń ishinde psıhologııalyq kómek berý joǵary oqý oryndarynyń rektorlaryna tabystaldy.
Qoǵamdyq densaýlyq saqtaý basqarmasyna sapaly medıtsınalyq qyzmet kórsetýdi qamtamasyz etý boıynsha jan-jaqty sharalar qabyldaý qajettigi tapsyryldy. Búginde atalǵan juqtyrý faktileri boıynsha Taýarlar men qyzmetterdiń sapasy men qaýipsizdigin baqylaý departamentimen epıdemıologııalyq tekserýler júrgizilýde.
