Almatydaǵy Orta Azııa ǵulamalarynyń forýmynda radıkaldy ıdeologııanyń taralýyna qarsy kúres máseleleri talqylanýda (FOTO)
ALMATY. QazAqparat-Búgin Almatyda elimiz boıynsha tuńǵysh ret Qazaqstan musylmandary dinı basqarmasynyń uıymdastyrýymen «Kelisim men jasampazdyq - Ortalyq Azııadaǵy Islamnyń dástúrli negizi» atty Orta Azııa ǵulamalarynyń forýmy óz jumysyn bastady.
«Forýmnyń negizgi maqsaty - ekstremızm men terrorızmdi boldyrmaý joldaryn, tetikterin birlesip izdestirý. Bul búgingi tańda búkil álemde ózekti máselege aınalyp otyrǵany belgili. Sonymen qatar, Orta Azııa musylmandarynyń kúshin bir arnaǵa jumyldyryp, qoǵamnyń tynyshtyǵy men birligi jolynda birlesip jumys jasaý. Osy rette barsha musylmandy orta joldy ustanýǵa, din atyn jamylyp, dindi ozbyrlyq áreketter men saıası jáne jeke múddeler úshin paıdalanýdy kózdeıtinderge ilespeýge shaqyryp, jamaǵattyń basyn qosýdy, biriktirýdi kózdeıdi», - dedi óz sózinde Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly.
Sondaı-aq, forýmda Orta Azııa elderindegi radıkaldy ıdeologııanyń taralýyna qarsy kúres máseleleri talqylanyp, qarar qabyldanyp, úndeý jarııalanady. Sonymen qatar, Islam ǵalymdary musylman úmmetin, jalpy halyqty ortaq mázhabymyzdyń mártebesin kóterip, qoǵamda tynyshtyq ornatý, jalpyǵa ortaq adamgershilik qundylyqtardy nasıhattaý, Islam dinin bolashaq urpaqqa durys jetkizý, ortaq mádenıetimiz ben dástúrimizdi jańǵyrtý, damytý máselelerin talqylaıdy.
Búgingi is-sharaǵa Qazaqstan, Qyrǵyzstan jáne Tájikstan memleketteriniń Bas múftıleri, bedeldi ǵalym-teolog jáne ımamdar qatysýda.
