Almatydaǵy órt: kópqabatty úıdiń terezesinen sekirgen turǵyn aýrýhanadan shyqty
«1 tamyzda №7 qalalyq klınıkalyq aýrýhananyń jedel járdem bólimine 1988 jyly týǵan naýqas aýyr halde jetkizildi. Klınıkalyq jáne zerthanalyq tekserýden keıin dereý jansaqtaý bólimine jatqyzyldy. Dárigerler oǵan katajaraqat, kóptegen synyq, ysqa ýlaný dıagnozyn qoıdy. Reanımatsııa bóliminde shokqa qarsy sharalar», - dep habarlady Almaty qalalyq qoǵamdyq densaýlyq saqtaý basqarmasynyń baspasóz qyzmetinen.
3 tamyzda jaǵdaıy turaqtalyp, polıjaraqattaný bólimine aýystyryldy, onda sımptomatıkalyq terapııa jalǵasty. Tıisti mamandardyń qatysýymen eki ret konsılıým ótkizildi. Búgin naýqas ambýlatorlyq emge shyǵaryldy, jaǵdaıy qanaǵattanarlyq.
№7 qalalyq klınıkalyq aýrýhanada órtten zardap shekken taǵy bir adam em qabyldap jatyr.
«2004 jyly týǵan ekinshi naýqas ta aýyr halde jetkizilgen bolatyn. Oǵan bas súıeginiń rezektsııalyq trepanatsııasy operatsııasy jasaldy. Ol eki kún jansaqtaý bóliminde jatyp, sodan keıin neırohırýrgııa bólimine aýystyryldy. Jaǵdaıy turaqty. Neırohırýrgııalyq bólimshe jaǵdaıynda em alyp jatyr», - dep tolyqtyrdy vedomstvodan.
Eske sala keteıik, 1 tamyz kúni 16 qabatty úıde órt tutanǵanyn habarlaǵan edik.
Qyzyl jalyn saǵat sol kúni 18:46 kezinde oqshaýlanyp, sóndirildi.
31 adam, onyń ishinde 16 bala aýrýhanaǵa jetkizilgen bolatyn.
Amaly qalmaǵan turǵyndar balalaryn terezeden laqtyrdy.
Zardap shekkenderdiń ishinde 2 júkti áıel bar.
Keıin Almaty qalalyq densaýlyq saqtaý basqarmasy bir adamnyń qaza tapqanyn habarlady
Órtten zardap shekken turǵyndar tamaq jáne jatyn orynmen qamtamasyz etildi.
Búgin Memleket basshysynyń Jarlyǵymen Almatydaǵy «Aqkent» yqsham aýdanynda bolǵan órt kezinde adam ómirin saqtap qalýǵa baılanysty qıyn-qystaý jaǵdaıda kórsetken erjúrektigi men janqııarlyǵy úshin bir top azamat marapattaldy.