Almatydaǵy órt: 13 otbasy baspanasyz qaldy
ALMATY. QazAqparat- Baqytjan Saǵyntaev Jetisý aýdanyndaǵy turǵyn úıden shyqqan órttiń sebepterin anyqtaýdy tapsyrdy, dep habarlaıdy QazAqparat tilshisi.
Almaty qalalyq ákimdiktiń baspasóz qyzmeti málim etkendeı, Jetisý aýdanynyń Aqtolqyn kóshesi, 12 mekenjaıdaǵy kópqabatty úıdegi órttiń sebepterin tekserý Almaty qalasynyń ákimi Baqytjan Saǵyntaevtyń jeke baqylaýynda.
«13 otbasy baspanasyz qaldy, onyń jeteýi týystarynyń úılerinde. Alty otbasynyń 23 múshesi ýaqytsha qonaqúılerge ornalastyrylǵan. Baqytjan Saǵyntaevtyń tapsyrmasy boıynsha olarǵa barlyq qajetti kómek kórsetilip jatyr, onyń ishinde gıgıena buıymdary men taǵam bar. Mektep jasyndaǵy balalarǵa oqý jylyna daıyndalýǵa kómek kórsetiledi»,- dep habarlady ákimdikten.
Órttiń shyǵý sebepteri anyqtalyp, komıssııa qorytyndysy shyqqan soń turǵyndarynyń baspana máselesi boıynsha sheshim qabyldanatyn bolady.
Eske salaıyq, keshe Almatyda 1943 jyly salynǵan eki qabatty úı órtenip, tórt adam qutqarylǵan bolatyn.
