Almatydaǵy óner kolledjiniń stýdentteri bir aptada úsh ret evakýatsııalandy
ALMATY. QazAqparat - Almatyda T. Júrgenov atyndaǵy Qazaq ulttyq óner akademııasynyń janyndaǵy kolledjine bir aptada úshinshi ret jarylǵysh zat qoıylǵany týraly habarlama tústi, dep habarlaıdy QazAqparat tilshisi.
Almaty qalalyq Polıtsııa departamenti málim etkendeı, qalanyń jedel jáne tótenshe jaǵdaılar qyzmetteri alǵashqy den qoıý sharalary aıasynda bilim mekemesine tekserý júrgizdi. Oqýshylar men ustazdar evakýatsııalandy.
«Belgili bolǵandaı, kolledj ǵımaratyn tekserý kezinde jarylys qurylǵylary tabylǵan joq. Bilim mekemesi shtattyq rejımde jumys istep tur»,- deıdi qalalyq Polıtsııa departamentiniń resmı ókili Saltanat Ázirbek.
Aıtýynsha, qazir polıtsııa bilim mekemesine jarylǵysh zat qoıylǵany týraly jalǵan aqparat taratqan adamdy anyqtap jatyr. Ol qylmystyq jaýapqa tartylady.
