Almatydaǵy oqys jaǵdaı: lıftini qalpyna keltirýge 800 myń teńge qajet
ALMATY. QazAqparat - Almatyda quzyrly organdar lıftidegi apattyq jaǵdaıǵa jolaýshylardyń ózderi kináli bolǵanyn anyqtady. Oqys jaǵdaı oryn alǵan lıftini jóndeýge 800 myń teńge qajet. Tehnıka kimniń esebinen jóndeletini áli belgisiz. Bul týraly QazAqparat tilshisine «Almatylıft» JShS dırektorynyń birinshi orynbasary Maksım Telıtskıı aıtty.
Onyń sózine qaraǵanda, oqys oqıǵanyń oryn alǵanyna jolaýshylardyń ózderi kináli.
«Lıft elektr energııasynyń aqaýynan nemese asa aýyr salmaqtan toqtady. Bul tehnıka, mehanızm bolǵan soń ondaı bolyp turady. Al jolaýshylar lıftidegi apattyq qyzmetke qońyraý shalmaǵan, olar lıftini qoldaný erejesin óreskel buzǵan. Lıftige tabyt alyp kirgen. Apattyq qońyraýǵa habarlassa, 5-10 mınýttan soń olardy op-ońaı alyp shyǵatyn edi. Onyń ornyna olar kabına esigin, shahta esigin qıratqan. Besinshi qabattykin buzady, ashylmaıdy. Sosyn 4-qabattyń esigin buzyp, 40 santımetrlik sańylaý arqyly tabytty shyǵarǵan. Sońǵy shyqqan adam lıft shahtasyna qulap ketti. Lıftini paıdalaný erejesi buzylǵan soń, ózderi de japa shekti. Basqa turǵyndarǵa da qıyn boldy», - dedi «Almatylıft» JShS bas dırektorynyń ekinshi orynbasary Maksım Telıtskıı.
Mamannyń aıtýynsha, isten shyqqan lıftini qalpyna keltirýge 800 myń teńgege jýyq qarajat kerek. Bul qarajatty kompanııa óz qaltasynan tóleı almaıdy.
Sebebi, múlikti qıratqan jolaýshylar.
Oqys oqıǵanyń jaı-japsaryn teksergen Almaty memlekettik Eńbek ınspektsııasy jáne kóshi-qon basqarmasy bul oqıǵada jolaýshylar aıypty ekenin anyqtady.
Sonymen qatar, «Almaty lıft» kompanııasy zardap shekken jigitke kórsetilgen medıtsınalyq shyǵynnyń barlyǵyn óz moıyndaryna alǵan.
«Bul jaǵdaı bolǵan soń bizdiń dırektorymyz birden aýrýhananyń bas dárigerine habarlasyp, emdeý shyǵyndaryn óz moınymyzǵa alatynymyzdy habarlady. Shyntýaıtyna kelgende, olaı isteýge mindetti emes edik. Biraq, adamgershilikke jat áreket kórsetpeıik dep sheshtik. Al, eger zardap shekken jigit bizdi aıyptaıtyn bolsa, onda biz de odan materıaldyq shyǵyndy talap ete alamyz», - dedi Maksım Telıtskıı.
Maman mundaı oqys oqıǵa Almatyda jıi bolyp turatynyn aıtty.
Jaqynda 50 jas shamasyndaǵy er adam da lıftide qalyp qoıyp, apattyq qyzmetti shaqyrmaǵan.
«Ol kisi de esikti buzyp shyqty. Shyqqan soń lıfti kompanııasyn aıyptady. Jolaýshylar lıftini paıdalaný erejesin jıi buzady. Sonyń kesirinen materıaldyq shyǵyn keledi. Lıft 2-3 kún istemeıdi. Basqalar zardap shegedi», - dedi ol.
Aıta ketý kerek, qaıǵyly oqıǵa 7-tamyzda «Aqbulaq» turǵyn úı kesheninde bolǵan.
34 jastaǵy er adam lıft shahtasyna abaısyzda qulap ketip, aýyr jaraqat aldy.
Dárigerlerdiń aıtýynsha, onyń 7 qabyrǵasy, bel omyrtqasy synǵan, kókbaýyry jyrtylyp ketken. Olar lıftimen ákesiniń máıitin jerleýge apara jatqan.
