Almatydaǵy Oqýshylar saraıy talapqa saı jumys istemeıdi - ákim
ALMATY. QazAqparat - Almaty qalasynyń ákimi Baqytjan Saǵyntaev qosymsha bilim alýǵa qatysty pikir bildirdi, dep habarlaıdy QazAqparat tilshisi.
«Meni alańdatatyn jaıt, turmysy tómen otbasynan shyqqan balalardyń qosymsha bilim alýyna múmkindik joq.Tegin úıirmeler tek qaǵaz júzinde ǵana jumys isteıdi. Sondyqtan, bizge qosymsha jáne orta bilim berý júıesiniń qyzmetin tolyq úılestirý qajet. Ol úshin qosymsha bilim berýdi damytyp, ony mektep baǵdarlamasymen belsendi túrde biriktirý qajet.Úıirmeler men sektsııalardy qarjylandyrý úshin bıznesti tartý qajet. Mektepter qalalyq ortany belsendi paıdalanýy kerek.Oqýshynyń bilim alýy men damýy úshin qalamyzdyń múmkindikteri barshylyq», - dedi ákim Almatydaǵy bilim berý júıesi qyzmetkerleriniń forýmynda.
Sonymen qatar, ol Almatydaǵy Oqýshylar saraıynyń jaǵdaıyn baıandap berdi.
«Senbi kúni men Oqýshylar saraıynda boldym. Onda kóbine Medeý aýdanynyń balalar keledi. Tarıhı erekshe ǵımarat. Biraq ishindegi qosymsha bilim berý júıesi zamanaýı talaptarǵa sáıkes kelmeıdi. Bul keńestik formattaǵy qarapaıym synyptar. Qarapaıym ústelder, shkaftar, parta ústindegi kompıýterler bári-bári burynǵy. Biz oqýshylar saraıyn jóndeýdi bastaımyz. Men mamandarǵa ne isteý kerektigin qarap, aıtýdy tapsyrdym. Maǵan trenajer zaly, basseın, is-sharalar men kezdesýlerge arnalǵan úlken jáne kishi zaldardy ǵana kórsetti. Balalarǵa arnalǵan basqa bólmeler qaıda?! Úlken ǵımarat eski standartqa saı jumys isteıtin bolady», - dedi A Baqytjan Saǵyntaev.
Sondaı-aq, ol barlyq aýdandaǵy mektep basshylaryna kóp balaly jáne az qamtamasyz etilgen otbasylardyń balalary úshin mektep qabyrǵasynda tegin sektsııalar men úıirmeler uıymdastyrýdy tapsyrdy.
«Búgingi tańda oqýshylarǵa arnalǵan úıler men mýzyka mektepteri qalanyń ortalyǵynda ornalasqan. Bul qala shetindegi aýdandar úshin qolaısyz. Máselen, 40 myńnan astam bala oqyp jatqan Alataý aýdanynda bir ǵana mektep úıi bar. 14 myńǵa jýyq oqýshysy bar Naýryzbaı aýdanynda qosymsha bilim berýdiń birde bir uıymy joq. Sondyqtan biz birtindep qalanyń shet jaǵynda mektep oqýshylarynyń saraılary men úılerin salýymyz kerek. Olardy abattandyrý boıynsha kóptegen jumystar kútip tur. Júzdegen balalar oıyn jáne sport alańdaryn salý qajet.», - dep atap ótti qala basshysy.
