Almatydaǵy nysandardan eshqandaı bomba tabylǵan joq – polıtsııa
ALMATY. QazAqparat – Almatyda «bomba» qoıyldy degen nysandardy qalanyń shuǵyl jedel qyzmetteri tekserip shyqty. Nátıjıesinde eshqandaı jarylǵysh zat tabylǵan joq, dep habarlaıdy QazAqparat tilshisi.
Almaty polıtsııa departamentine qalada úsh bank, eki saýda jáne oıyn-saýyq ortalyǵy, áýejaı jáne oqý ornyna «mına» qoıyldy degen habar túsken.
Buǵan deıin Almaty Polıtsııa departamenti qyzmetkerleri nysandardyń úsheýin tekserip shyqty. Úsh bankti saperler arnaıy tehnıkamen qarady. Qaýipsizdik maqsatynda barlyq nysannan qyzmetker men kelýshiler evakýatsııalandy. Aqparat rastalǵan joq. Bankter qalypty rejıde jumys istep tur .
«Eki saýda úıi men oqý ornynda tekserý jumystary aıaqtaldy. Ol jerlerden jarylǵysh zat tabylǵan joq»,- dep habarlady polıtsııadan.
Almaty halyqaralyq áýejaıy baspasóz qyzmetiniń málimetinshe, qaýipsizdik hattamasyna sáıkes, jolaýshylar men qyzmetkerler evakýatsııalanǵan.
«Keshendi tekserý nátıjesinde «bomba» týraly aqparat rastalmady. Áýejaı qalypty jumysqa kóshti»,- dep habarlady áýejaı baspasóz qyzmetinen.
Osy jaǵdaıǵa baılanysty áýejaıda 6 reıs keıinge shegerildi.
