Almatydaǵy Naýryzbaı aýdanynyń sýmen qamtamasyz etý jelileriniń 32 paıyzy áli de jeke qolda
Bul týraly keshe Almaty qalasy ákimdiginde QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamenti janyndaǵy Qoǵamdyq keńestiń qorytyndy otyrysynda qalalyq Energetıka jáne kommýnaldyq sharýashylyq basqarmasynyń basshysy Ermek Úsenbaev málim etti.
«Sý sharýashylyǵy boıynsha Naýryzbaı aýdany turǵyndarynan shaǵymdar kóp túsip jatyr. Bul túsinikti de. Aýdanda sýmen qamtamasyz etý jelileriniń 60 paıyzy qalalyq kommýnaldyq sharýashylyqtyń qaramaǵyna áli ótken joq. Nege? Óıtkeni, jeliniń 32 paıyzy áli de jeke qolda. 24 paıyzy qaraýsyz jatyr nemese sapasy syn kótermeıdi. Sondyqtan, «Nurly jol» baǵdarlamasy aıasynda jelilerdi júrgizýge 2014-2015 jyldary 9 mlrd. teńge bólingen. Aldaǵy jyly «Qalqaman-1», «Qalqaman-2» jáne «Qalqaman-3 yqshamaýdandary sý jelilerimen qamtamasyz etiledi. Barlyǵy 27 kóshede aýyz sý jáne káriz jelileri júrgiziledi. Sonymen qatar, kóshelerge asfalt tóseledi», - dedi E. Úsenbaev.
Sondaı-aq, ol Naýryzbaı aýdany boıynsha qalanyń joǵary jaǵynda, ıaǵnı taý bókterlerinde ornalasqan eldi mekenderge de sý jelileri tartylatyndyǵyn jetkizdi.
«Munda saıajaılyq seriktestikter áli de gazmen qamtamasyz etilgen joq. Munda da qaraýsyz qalǵan jeliler bar. Biz «Almaty qalasyn damytý-2020» baǵdarlamasy aıasynda jalpy somasy 152 mlrd. teńge bolatyn 100 jobany ázirlep qoıdyq. Onyń ishinde 48 mlrd. teńge gazben qamtamasyz etý jáne káriz júıelerin qalpyna keltirýge baǵyttalady. Al 51 mlrd. teńge jylýmen qamtamasyz etýge jumsalady», - dedi E. Úsenbaev.
