Almatydaǵy Naýryzbaı aýdanynda TJ rejimi alynyp tastaldy (FOTO)
ALMATY. QazAqparat - Almaty qalasynyń Naýryzbaı aýdanynda 2015 jyldyń 23 shildesinde jarııa etilgen Tótenshe jaǵdaı rejimi alynyp tastaldy.
Bul týraly búgin Almaty qalasy ákiminiń baspasóz qyzmetinen habarlady.
«Almaty ákimi Baýyrjan Baıbek búgin Naýryzbaı aýdanyn aralap, jergilikti turǵyndarmen kezdesti. Sondaı-aq qala basshysy Qaraǵaıly ózeniniń sý arnasyn qalpyna keltirý jumystarymen tanysty jáne sý toǵanynyń súzgileý stansasyn, selden qorǵaý bógetin, sý tazartý stansasyn aralap, bilim nysandarynyń aldaǵy oqý jylyna daıyndyǵyn tekserdi», - delingen habarlamada.
Odan basqa, Baýyrjan Baıbek osy jumys sapary barysynda qalalyq organ basshylarymen kóshpeli keńes ótkizdi. Onda memlekettik organdardyń jetekshileri atqarylyp jatqan jumystar men aldaǵy josparlar jóninde baıandama jasady. Jıyn barysynda turǵyndardy sýmen qamtamasyz etýge arnalǵan tehnıkalyq jabdyqtardy qalpyna keltirý jumystarynyń oń nátıje berip jatqandyǵy jáne tazartýdyń tolyq kezeńinen keıin aýyz sý sapasynyń birshama jaqsarǵandyǵy aıtyldy.
Qazirgi tańda jalpy uzyndyǵy 13 shaqyrym bolatyn Qaraǵaıly ózeniniń zaqymdalǵan 7 shaqyrymynyń 5 shaqyrymnan astam jeri tazartylyp, jaǵalaýdy nyǵaıtý jumystary júrgizildi.
406 ýchastok tazartylyp, 175 855 tekshe metr turmystyq qaldyqtar, laı jáne tas úıindileri shyǵaryldy.
Ulttyq gvardııanyń nómiri №28237-shi áskerı bólimi jaýyngerleri men tehnıkasynyń kómegimen nómiri №187-shi orta mekteptiń jertólelik bólmeleri tazartyldy. Qazirgi sátte mektep 98 paıyzǵa tazartylǵan.
Qala basshysy Tótenshe jaǵdaıdy boldyrmaý maqsatynda birqatar aldyn alý sharalaryn júrgizýdi tapsyrdy. Ózen jaǵalaýyn nyǵaıtý kerektigin basa aıtty. Sonymen qatar, sel tasqynynan zardap shekken turǵyndardyń talap-tilekterin tyńdady. Turǵyndar Elbasynyń kórsetip jatqan qamqorlyǵyna jáne sel saldaryn joıý barysynda barlyq memlekettik qurylymdardyń úılesimdi áreket jasaǵandaryna alǵystaryn aıtyp, zardap shekken aýdandarda kúndelikti turmys-tirshilik burynǵy qalpyna birtindep kelip jatqandyǵyn jetkizdi.
«Tótenshe jaǵdaı rejimin alyp tastaý týraly sheshim qabyldandy. Endi, budan keıingi tazartý, abattandyrý jumystaryn kommýnaldyq qyzmetter shtattyq rejimde júrgizetin bolady. Qazir birinshi kezektegi midetterdiń biri - barlyq úsh mektepti aldaǵy oqý jylyna jaqsylap daıyndaý. Barlyq tehnıkalyq jáne sanıtarlyq normalar saqtalatyn bolsyn. Balalar zardap shekpeýi kerek. Eń bastysy, ózen arnasyn bekitip, nyǵaıtý qajet», - dedi B. Baıbek.
