Almatydaǵy «MOSKVA metropolitan» saýda oıyn-saýyq ortalyǵyna kelýshiler evakýatsııalandy
ALMATY. QazAqparat - Almatyda «MOSKVA metropolitan» saýda oıyn-saýyq ortalyǵyna bomba qoıylǵany týraly habarlama jalǵan bolyp shyqty, dep habarlaıdy QazAqparat tilshisi.
Jelide saýda oıyn-saýyq ortalyǵyna kelýshilerdi evakýatsııalaý sátiniń vıdeosy tarady.
Atalǵan jaıt boıynsha saýda ortalyǵynyń ákimshiligi málimdeme jasady.
«Quqyq qorǵaý organdary saýda oıyn-saýyq ortalyǵyna bomba qoıylǵany týraly 102 pýltine qońyraý túskenin habarlady. Nátıjesinde saýda oıyn-saýyq ortalyǵyna ákimshiligi, kúzet qyzmeti jáne quqyq qorǵaý organdary jalǵa alýshylar men kelýshilerdi evakýatsııalaý úshin, sondaı-aq, quqyq qorǵaý organdarynyń is-sharalardy odan ári júzege asyrý úshin tıisti stsenarıı ázirledi. Qysqa merzimde qabyldanǵan is-sharalar nátıjesinde habarlamanyń jalǵan ekendigi anyqtaldy», - delinedi saýda ortalyǵynyń ókili taratqan habarlamada.
Qazirgi ýaqytta «MOSKVA metropolitan» saýda oıyn-saýyq ortalyǵy shtattyq rejımde jumys istep tur.
