Almatydaǵy «Mızam» bazarynda azyq-túliktiń ornyna jıhaz satylǵan
ALMATY. QazAqparat - Almaty ákimdigi «Mızam» bazarymen jalǵa alý týraly kelisimshartty buzbaq. Quzyrly organdar qajetti qujattardy daıyndaý ústinde, dep habarlaıdy QazAqparat tilshisi.
2017 jyly qalalyq aýylsharýashylyǵy basqarmasy men «Mizam Operation» JShS arasynda memorandýmǵa qol qoıylǵan bolatyn.
Qujatqa sáıkes Soltústik aınalma jolyndaǵy bul bazar ıesi naryqty sapaly taýarlarmen qamtý týraly mindettemelerdi moınyna alǵan.
Osy maqsatta qala qurylysy keńesiniń nusqaýlyǵymen «Mızam» bazary mańynda zamanaýı kóterme-saýda ortalyǵyn salý josparlanǵan edi.
Alaıda, JShS memorandýmda belgilengen mindettemelerin tolyq oryndamaǵan.
Saýa ortalyǵynda azyq-túlik emes, jıhaz jáne basqa da turmystyq zattar satylyp kelgen. Sondaı-aq, ýaǵdalasqan saýda ortalyǵy kesheniniń ornyna tez arada jyldam qarqynmen konteınerlerdiń qabaty boı kótergen.
Kelisimge saı bolmasa da atalǵan konteınerler kásipkerlerge jalǵa berilip qoıǵan.
Qalalyq memlekettik sáýlet-qurylys baqylaý basqarmasy «Mızam» bazarynda ruqsat qujattarynsyz, zańsyz 8 myń sharshy metrge sozylǵan konteınerlerdiń jıyntyǵy qurylǵanyn anyqtady. Bul qurylym sanıtarlyq normalarǵa saı emes ekeni belgili boldy.
Bazar basshylaryna 1,5 mln teńge kóleminde ákimshilik aıyppul salyndy.
Sonymen qatar, qala bıligi eki jer ýchaskesin qysqa merzimdi jalǵa alý kelisimshartyn buzý týraly sheshim qabyldady.
Aıta ketý kerek, QR Prezıdenti Nursultan Nazarbaev Qazaqstan halqyna joldaýynda bazarlardy jańǵyrtý arqyly kóleńkeli ekonomıkany qysqartý kerektigin tapsyrǵan bolatyn.
Búginde Almatyda 57 bazardyń 17-si qaıta jasaldy. Jyl sońyna deıin taǵy 8 bazar jańǵyrtylyp, paıdalanýǵa berilmek. 2020 jylǵa deıin 26 bazar qalpyna keltiriledi.
