Almatydaǵy «Mega» SOO-da balanyń ústine oıynshyq músin qulap ketti
ALMATY. QazAqparat - Almatydaǵy oıyn-saýyq ortalyqtarynyń birinde balanyń ústine oıynshyq músin qulap ketti, dep habarlaıdy QazAqparat tilshisi.
Oqys oqıǵa «Mega» saýda, oıyn-saýyq ortalyǵynda boldy.
Bul týraly áleýmettik jelide Baqytjan Bazarbek esimdi qoldanýshy jazba jarııalady.
«Búgin Almatydaǵy «Mega» oıyn-saýyq ortalyǵynda dosymnyń ulynyń ústine úlken oıynshyq músini qulap ketti. Úlken músin bar bolǵany skotchpen jabystyrylǵan», - dep jazdy ol.
Kishkentaı balanyń ákesi Jánibek Bashanovtyń aıtýynsha, ulynyń mıy shaıqalǵan. Sonymen qatar, júktiligine toǵyz aı bolǵan áıeli shoshyp qalǵan.
«Abyroı bolǵanda, balam aman. Biraq, onyń mıy shaıqaldy. Qazir biz tekserilip jatyrmyz. Ázirge polıtsııaǵa aryzdanbadyq. Aldaǵy ýaqytta sotqa júginemiz»,- deıdi zardap shekken balanyń ákesi Jánibek Bashanov.
