Almatydaǵy «Maxima» saýda oıyn-saýyq ortalyǵynan jarylǵysh zatty izdedi
ALMATY. QazAqparat - Almatyda Raıymbek dańǵyly boıynda ornalasqan "Maxima" saýda oıyn-saýyq ortalyǵynda arnaıy maqsattaǵy «Arlan» bólimshesi saperleriniń júrgizgen izdestirý sharasy aıaqtaldy.
Ǵımarattan jarylǵysh zat tabylǵan joq. Bul týraly jańa ǵana Almaty qalasy ІІD resmı ókili Saltanat Ázirbek habarlady.
«Búgin keshke 18 saǵat 05 mınýtta «102» pýltine bir jasóspirim qyz habarlasyp, "Maxima" saýda oıyn-saýyq ortalyǵynyń artyndaǵy turǵyn úılerdiń birinde turatyndyǵyn jáne «bomba laqtyryp jatqan uldardyń áreketine» shaǵymdanatyndyǵy týraly aıtqan. Kelip túsken habar túsiniksizdeý bolǵanymen birneshe mınýttyń ishinde oqıǵa ornyna jedel jáne shuǵyl toıtarý qyzmetteriniń qyzmetkerleri kelip jetti. Eń aldymen saýda oıyn-saýyq ortalyǵynyń qyzmetkerleri men kelýshiler barlyǵy 300 adam qaýipsiz aımaqqa shyǵaryldy. Polıtsııa qyzmetkerleri ortalyqtyń aýmaǵyn qorshaýǵa aldy. Sodan keıin arnaıy maqsattaǵy «Arlan» bólimshesiniń saperleri izdestirý sharasyna kiristi. Tekserý 18 saǵat 55 mınýtta aıaqtaldy. Jarylǵysh zat tabylmady. Qazir oqıǵanyń mán-jaıy anyqtalý ústinde», - dedi S. Ázirbek.
