Almatydaǵy maska shyǵaratyn kásiporynnyń qýatyn arttyramyz - Erkebulan Orazalın
ALMATY. QazAqparat – Almatyda ótken baspasóz brıfıngi barysynda qalalyq Kásipkerlik jáne ınvestıtsııalar basqarmasynyń basshysy Erkebulan Orazalın maskalar men zararsyzdandyrý quraldarynyń óndirisi týraly aıtyp berdi, dep habarlaıdy QazAqparat tilshisi.
«Almaty oblysynda óndiristik kásiporyn jumys istep tur. Zaýyt aıyna 3 mln maska óndire alady. Bul ónimniń mańyzdylyǵy artýyna baılanysty óndiris qazir SK «Farmatsııa» arqyly kelisimshartpen júzege asyrlyp jatyr. Óndiristiń keıbir bóligi Almatyǵa jiberiledi. Qalǵany el óńirlerine kelisimshart boıynsha beriledi. Zaýyt kúnine 100 myń maska shyǵarsa, onyń 60 myńy Almatyǵa jiberilse, qalǵany óńirlerge taratylady. Biraq, bizde tapshylyq týyp otyr. Ony jasyrmaımyz», - dedi Erkebulan Orazalın.
Osyǵan baılanysty atalǵan kásiporynnyń óndiristik qýatyn arttyrý kózdelip otyr.
«Dúısenbige deıin jańa qondyrǵy jetkizilip, óndiris qýatyn aıyna 8 mln maskaǵa kóterý kózdelip otyr. SK «Farmatsııa» basshylarymen sóılestik. Maska aınalasyndaǵy alypsatarlyqty boldyrmaý úshin kásiporynǵa aınalym qarajatyn quıyp beretin bolamyz. Olar sol qarajatqa shıkizat alady. Bul óz kezeginde bizge qaladaǵy iri dárihanalarmen tikeleı jumys isteýge múmkindik beredi», - dedi Erkebulan Orazalın.
Ol sonymen qatar antıseptık pen sanıtaızerler týraly da aıtty.
«Bul ónimderdi óndiretin kásiporyndy da aınalym qarajatyn bólip qoldaıtyn bolamyz. Jaqyn arada qosymsha óndiristi iske qosamyz. Keler aptada bólshek saýda naryǵynda taýar tapshylyǵyn sheship, halyq arasyndaǵy alasapyrandy toqtatamyz dep oılaımyz. Sonymen qatar, maska jáne basqa da quraldardy satyp alýda shekteý qoıýdy oılastyryp jatyrmyz. Óıtkeni, keıbir tulǵalar býma-býma satyp alyp, ary qaraı satyp, paıda kórýdi oılaıdy», - dedi basqarma basshysy.
Munyń aldynda qala ákiminiń orynbasary, arnaıy shtab basshysy Erjan Babaqumarov qalada maska óndirisin keńeıtýdi qolǵa alǵanyn aıtqan bolatyn.
Almatyda koronavırýs áli eshkimde zerthanalyq deńgeıde rastalǵan joq.
