Almatydaǵy mamandandyrylǵan HQKO Armenııadan jetkizilgen kólikke alǵashqy tirkeý nómirin berdi
ALMATY. QazAqparat – Almatyda mamandandyrylǵan HQKO-da Armenııadan ákelingen alǵashqy kólik tirkeldi, dep habarlaıdy QazAqparat tilshisi.
47 jastaǵy almatylyq Hosrov Gasanov Qazaqstanda alǵashqylardyń biri bolyp Armenııadan jetkizilgen kóligin tirkep, nómir aldy.
«Men «Hıýndaı Grand Stareks» avtokóligin Armenııadan 2019 jyldyń qarasha aıynda alyp keldim. Sodan beri ony elimizde qalaı zańdastyram dep ábden ýaıymdadym. Qalada emin– erkin aıdap júre almadym. Memleketke rahmet, bizge múmkindik berdi. Búgin men mamandandyrylǵan halyqqa qyzmet kórsetý ortalyǵyna keldim, mamandar 15 mınýttyń ishinde kóligimdi tirkep berdi. Memlekettik baj - 11 946 teńge tóledim. Endi men zańdy túrde esh kedergisiz júre alamyn. Memleketimizge taǵy da rahmet», - dedi Hosrov Gasanov.
Eske salaıyq, Memleket basshysynyń tapsyrmasyna sáıkes, Úkimettiń arnaıy qaýlysy shyqty. Qazaqstandyqtarǵa Armenııadan ákelgen kólikterin 2020 jyldyń 1 aqpanyna deıin tirkeýge múmkindik berdi.
«Birinshiden, Úkimet 2020 jyldyń 1 aqpanyna deıin Armenııadan ákelgen avtokólikterdi tirkeý týraly sheshim qabyldady. Ekinshiden, osy jyldyń 1 maýsymy men 1 qyrkúıegi aralyǵynda tirkeý júrgizýge ruqsat berildi. Úshinshiden, tek sol jaqtaǵy basqarý elementteri bar avtokólikter tirkeýge jatady. Tórtinshiden, úsh tólemmen shekteý týraly sheshim qabyldandy: tirkeý jarnasy - 695 teńge, tirkeý kýáligi úshin tólem - 3 473 teńge jáne MTNB úshin alym - 7 778 teńge. Tólemderdiń jalpy somasy 11 946 teńgeni quraıdy. QR 2020 jyldyń 1 aqpanynan keıin ákelingen kólik quraldaryn tirkeýge ruqsat etilmeıdi. Sonymen qatar, Armenııa Respýblıkasynyń ýákiletti organy bergen tirkeý qujattarynda menshik ıesi retinde kórsetilmegen adamdarǵa tirkeý júrgizilmeıdi», - dedi, Almaty qalalyq PD Ákimshilik polıtsııa basqarmasynyń bastyǵy Jandos Muratálıev.
