Almatydaǵy «Mádenı Azıada» - ótetin sharalar
ALMATY. 26 qańtar. QazAqparat /Názıra Eleýhan/ - 30 qańtarda Astana men Almatyda bastalatyn 7-Qysqy Azııa oıyndary tek qana sporttyq shara emes, ol sonymen qatar aldymen salt-dástúrimizdi, qazaq tarıhyn nasıhattaýǵa, sondaı-aq, elimizdiń týrıstik múmkindikterin ulǵaıtýǵa baǵyttalǵan mádenı oqıǵa bolmaq.
Almatyda osy baǵytta «Mádenı Azıada» baǵdarlamasy aıasynda bir emes, birneshe sharalar ótpek. 1-5 aqpan aralyǵynda QR Ǵylym akademııasynyń aldynda «Qazaq aýyly» boı kóteretin bolady. Onda ártúrli taqyryptaǵy qazaq úıler men arnaıy jasalǵan dekoratsııalar qazaq halqynyń ómiri men turmys-saltynan syr shertetin bolady. Azıada qonaqtary men qatysýshylar munda at oıyndaryn tamashalap, qazaqtyń ulttyq tamaqtarynan dám tata alady.
Etnoaýyl sonymen qatar, «Qar barysy» saıabaǵynda da boı kóteretin bolady. Aýyl muz ben qardan salynady. Saıabaqta «Uly Jibek Joly», «Azııa elderiniń mádenıeti», «Azııa as úıi» atty festıvalder ótkizilmek, sonymen qatar bul jerde kóptegen kontsertter ótetin bolady. Munda qonaqtar shanamen syrǵanap, atshanamen serýendeı alady.
Al jastarǵa jáne belsendi oıyn-saýyq qurýshylarǵa arnap, 2-4 aqpan aralyǵynda «Astana» alańynda ashyq aspan astyndaǵy bı keshteri uıymdastyrylatyn bolady.
Bunymen qatar, Almaty sheteldik qonaqtar úshin qazaqstandyq estrada, halyq, klassıka, djaz, zamanaýı tanymal mýzyka juldyzdarynyń qatysýymen ótetin kontserttik baǵdarlamalar daıyndaýda. Bul sharalar qalanyń mádenı oshaqtarynda 1-5 aqpan aralyǵynda ótedi.
Sonymen qatar «Mádenı Azıada» baǵdarlamasy aıasynda qalanyń eń úzdik kınotetrlarynda 3-5 aralyǵynda «Kınoazıada» ótkizilmek. Bul kúnderi «Tsezar», «Arman», «Rodına», «Kınopark-4», «Globýs» kınoteatrlarynda qazaqstandyq kınokartınalarmen qatar, sporttyq taqyrypqa arnalǵan tolyqmetrajdy kórkem fılmder men derekti fılmder kórsetiledi.
