Almatydaǵy LRT qurylysyna 25 ınvestor qyzyǵýshylyq tanytty
ALMATY. QazAqparat - Almatydaǵy jeńil relsti kólik jobasyn bastaýǵa 25 ınvestor qyzyǵýshylyq bildirip otyr, dep habarlaıdy QazAqparat tilshisi.
Bul týraly Almaty ákimi Baýyrjan Baıbek qalanyń aktıvimen kezdesý barysynda baıandady.
«Biz Belgııada úlken kezdesý ótkizdik. Almatydaǵy LRT qurylysyna qatysýǵa 25 ınvestor qyzyǵýshylyq bildirdi. Jaqynda eki kezeńnen turatyn konkýrs bastalady. Nátıjesinde kók bazardan «Almaty arenaǵa» deıingi aralyqta 22,72 shaqyrym qashyqtyqta júrdek kólikter shyǵatyn bolady. Bul Almatynyń kelbetin túpkilikti ózgertedi»,- dedi Baýyrjan Baıbek.
Qala ákiminiń aıtýynsha, ekologııalyq turǵydan taza kólikke basymdyq berý Almatynyń 2020 jylǵa deıingi damý baǵdarlamasynda kórsetilgen.
«Búgin qalada jolaýshylar tasymalynyń 1/5 bóligi elektr energııasymen júzege asady. Gazben júretin kólikterdi qosqanda jalpy ekologııalyq kólikterdiń 60 %-y ekologııalyq kólikke jatady. Jolaýshylarǵa yńǵaıly bolý úshin BRT avtobýstary, júrdek avtobýstar shyǵatyn bolady. Jyldyń sońyna deıin 8,7 shaqyrymdyq alǵashqy kezeń, 22,4 shaqyrymdyq tolyq dáliz 2021 jyly paıdalanýǵa beriledi», - dedi B.Baıbek.
Úlken Almaty aınalma jolynyń qurylysy jer aıaǵy keńigen soń bastalmaq.
«Úlken Almaty aınalma joly ashylsa, kúnine Almaty joldary 40-60 myń kólikke jeńildeıtin bolady. Sýbmerdiger retinde almatylyq kompanııalar bolǵanyn qalaımyz. Olar qalaǵa salyq tóleıdi. Almatyda Prezıdent osyndaı úlken jobalardyń bolǵanyn qoldaıdy. Qalaǵa aýqymdy ınvestıtsııa quıylyp jatyr. Az ýaqytta qalanyń qalaı túrlengeniniń kýási bolasyzdar», - dedi Baýyrjan Baıbek.
Qala ákimi jazda Falkon-Evrobas nemis kompanııasymen birikken elektrobýs quraý zaýyty ashylatynyn aıtty.
Qazirdiń ózinde zamanaýı jabdyqtalǵan kólikke Tbılısı men Sıngapýrdan qyzyǵýshylar tabylyp otyr.
Buǵan deıin Baýyrjan Baıbek LRT jobasyn júzege asyrýǵa 125-130 mlrd teńge jumsalatynyn aıtqan bolatyn.
