Almatydaǵy KVI-den emdeýge arnalǵan aýrýhana bos turǵan joq

ALMATY. QazAqparat – Almatyda koronavırýs ınfektsııasyn emdeýge arnaıy salynǵan 500 tósektik aýrýhanada qazir maýsymdyq ınfektsııa men mononýkleoz, shanaq, brýtsellez juqtyrǵandar emdelip jatyr. Bul týraly Almaty qalalyq Qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.

Qazir qaladaǵy epıdemıologııalyq ahýal jaqsardy. Desek te, I. Jekenova atyndaǵy juqpaly aýrýlar aýrýhanasy qalypty jaǵdaıda jumys istep tur.

«Aıta ketý kerek, ǵımarat qajetti dıagnostıkalyq quraldarmen tolyq jabdyqtalǵan, sondaı-aq jansaqtaý bóliminde zamanaýı jeldetý júıesi bar, taza bólmeler kesheni ornalasqan. Sonymen qatar, aǵyndy sýlardy zalalsyzdandyrý júıesi jumys isteıdi. Tósek-oryndar 100% ottegimen qamtamasyz etilgen. Aýrýhanada juqpaly aýrýlarmen aýyratyn naýqastardy emdeýge mýltıdıstsıplınarlyq kózqaras úshin jetkilikti kadrlyq resýrstar bar. Bilikti epıdemıologtar, nevropatologtar, gastroenterologtar, pýlmonologtar, endokrınologtar, kardıologtar jumys isteıdi», - dep jaýap berdi basqarmadan «QazAqparat» tilshisi joldaǵan saýalǵa.

Basqarma dereginshe, jyl basynan beri koronavırýs ınfektsııasyn juqtyrýshylardyń sany azaıdy. Biraq, maýsymdyq ınfektsııalardy (JRVI, tumaý, ishek ınfektsııalaryn) qospaǵanda, gerpesvırýstyq (ınfektsııalyq mononýkleoz, shanaq jáne taǵy basqa), zoonozdyq ınfektsııany (brýtsellez) juqtyrǵandar kóbeıgen.

Eske salaıyq, Almatyda koronavırýs ınfektsııasyn emdeýge arnalǵan gospıtaldiń qurylysyna 5,5 mlrd teńge bólingen bolatyn.