Almatydaǵy qurylys kompanııalaryna aıyppul salynýda
ALMATY. QazAqparat -Almatyda qaýipsizdik erejelerin saqtamaǵan qurylys kompanııalaryna aıyppul salynady. Bul týraly Qala qurylysyn baqylaý basqarmasy málim etti, dep habarlaıdy QazAqparat tilshisi.
«Qala ákimi tapsyrmasy boıynsha qurylys barysyn baqylaý kúsheıtildi. Birinshi kezeńde salynyp jatqan búkil 84 turǵyn úı kesheni birqatar krıterıı boıynsha tekseriledi. Anyqtalǵan zańsyzdyqtardy joıý eskertildi. Qurylysshylarmen áńgime júrgizildi, másele baqylaýda», - dep habarlady basqarmadan.
Vedomstvo málimetke sáıkes, buǵan deıin ÁQBtK-niń 312-baby boıynsha «Investment Building Company», «Samuryq, Barlas qurylys», «Sheberbuild», «Exclusive construction», «Rıgolıt», «Salavat stroy», «Dıal-stroı», «ASI-stroı», «Asia Stroy-ST», «Kaz Engineer system», «Kraftın stroı», «Nest stroy», «Energy art stroy», «Jannat Stroı», «Sonıta stroı» jáne basqalary jaýapqa tartyldy.
«Qaýipsizdik tehnıkasy boıynsha qurylys kezinde nysandar qorshalýy tıis, jumystyń túrli kezeńderinde qorǵanys torlary, qorǵaý-ustaý júıesi paıdalanylýy kerek. Qurylysshylar óz kezeginde arnaıy kıimmen, onyń ishinde saqtandyrý beldikterimen qamtamasyz etilýi qajet», - dep atap ótti vedomstvadan.
Aıta keteıik, megapolıs ákimi Baqytjan Saǵyntaev barlyq qurylys alańynda qaýipsizdik erejeleriniń saqtalýyn tekserýdi tapsyrǵan bolatyn.
