Almatydaǵy krematorıı nege paıdalanýǵa berilmeı tur
Krematorııdiń naqty qashan ashylatyny belgisiz. Almaty qalasynyń qurylys basqarmasy jobanyń eki bólikten: ǵımarat pen ınjenerlik jelilerin salýdan turatynyn habarlady.
«Ǵımarattyń qurylys-montaj jumystary 2021 jyly jeltoqsan aıynda aıaqtaldy. Búgingi kúni krematorııdi paıdalanýǵa berý úshin nysanǵa syrtqy ınjenerlik jelilerdi jetkizýdi aıaqtaý qajet. Syrtqy jeliler boıynsha qurylys-montajdaý jumysyn toqtata turý – krematorııdiń jumys isteýi úshin jobany túzetýge baılanysty boldy. Túzetý gaz qubyrynyń magıstraldyq trassasynyń ózgerýine (shyǵarylýyna) baılanysty júrgizildi», - dep habarlady basqarmadan.
Bekitilgen jobalyq-smetalyq qujattamaǵa sáıkes, nysan eki aýysymdyq jumys kezinde táýligine 23-24 krematsııa ótkizý qabilettiligine eseptelgen. Bul ǵımarat tek krematsııaǵa arnalǵan, qoshtasý rásimin ótkizý múmkindigi bar ekinshi tıptegi krematorıı bolmaq. Sondaı-aq, krematorıı ǵımaratynda ákimshilik jáne jumysshylarǵa arnalǵan bólmeler ornalasqan. Sondaı-aq, dýsh, kıim aýystyratyn bólmeler, ǵuryptyq kerek-jaraqtar dúkeni bar.
«Ǵımarattyń qurylys-montajdaý jumystary aıaqtalǵan soń paıdalanýshy uıym ýákiletti organdarmen krematsııa salasyndaǵy zańnamalyq reglamentti (qarjylandyrý kózi, krematsııalaýǵa jatatyn azamattardyń sanaty, krematorııdiń jumys isteý qaǵıdasy) keńeıtý boıynsha jumys júrgizetin bolady», - dep tolyqtyrdy vedomstvodan.
Eske salaıyq, Almaty ákimdigi krematorıı qurylysynyń jobalyq-smetalyq qujattamasyn jasaýǵa tender jarııalaǵan bolatyn.
Krematorııdiń qurylys jumystary 2021 jyldyń jeltoqsan aıynda aıaqtaldy. Ony 2022 jyldyń mamyr aıynda paıdalanýǵa berý josparlanǵan.
Alaıda, krematorııdi ashý jáne paıdalanýǵa berý birneshe ret keıinge qaldyryldy.