Almatydaǵy koronavırýs juqtyrǵandarǵa arnalǵan aýrýhananyń 90 paıyzy daıyn
ALMATY. QazAqparat - Almaty qalasynyń ákimi Baqytjan Saǵyntaev 20 sáýirden bastap jumysyn bastaǵaly otyrǵan birqatar ónerkásip jáne qurylys kásiporyndaryn aralady, dep habarlaıdy QazAqparat tilshisi.
Qala ákimi salynyp jatqan «Terra» saýda kesheni, Naýryzbaı aýdanyndaǵy zańdy tulǵalarǵa arnalǵan HQKO, «Hyundai Trans Kazakhstan», AZTM jáne «Almatyenergoservıs» zaýyttaryn aralap kórdi.
Jumysty qaıta bastaıtyn kásiporyndardan qyzmetkerlerdiń sanıtarlyq qaýipsizdigin qamtamasyz etý talap etiledi. Qurylys alańdary men kásiporyndarda dezınfektsııalaý jumystary turaqty túrde júrgizilýi tıis. Qyzmetkerler jeke qorǵanys quraldarymen qamtamasyz etiledi. Kireberisterde zararsyzdandyrý stantsııalary jabdyqtalady, sondaı-aq, jumysshylardyń dene qyzýy tekseriletin bolady. Qoljetimdi jerlerde sanıtaızerler ornalastyrylyp, jumys oryndarynda jáne ashanalarda qaýipsiz qashyqtyq qamtamasyz etiledi.
«Qyzmetkerlerdiń qaýipsizdigi únemi qamtamasyz etilýi tıis. Bul oryndalýy tıis jumystardy tekseretin quramynda sanepıdemıologtar men «Atameken» UKP ókilderi bar komıssııanyń basty talaby. Quqyq buzýshylyq oryn alǵan jaǵdaıda jumys berýshi jaýapkershilikke tartylady. Al kompanııa qyzmetin TJ rejımi aıaqtalǵanǵa deıin toqtatamyz», – dep atap ótti Baqytjan Saǵyntaev.
Qala ákimi tez qurastyrylatyn modýldik bloktardan turatyn gospıtal qurylysynyń barysymen tanysty. 280 orynǵa arnalǵan gospıtal provızorlyq ortalyq bolady.
Onda baılanysta bolǵandar men SOVID-19 ınfektsııasyn juqtyrǵan adamdar jatady. Nysan 90% -ǵa daıyn. Qazirgi ýaqytta personal iriktelip, jabdyqtar jınaqtalyp jatyr.
