Almatydaǵy kópqabatty úıdegi órt: Jalyn 1500 sharshy metr aýmaqty sharpydy
ALMATY. QazAqparat – Almatyda tórt qabatty turǵyn úıden shyqqan órt oqshaýlandy. Bul týraly Tótenshe jaǵdaılar departamenti málim etti, dep habarlaıdy QazAqparat tilshisi.
Almaty qalalyq Tótenshe jaǵdaılar departamentiniń málimetine sáıkes, órt sóndirýshiler N. Nazarbaev dańǵyly 124 mekenjaıynda tórt qabatty úıden shyqqan órtti oqshaýlady.
Aldyn ala boljam boıynsha órt 1500 sharshy metrdi sharpydy.
Turǵyndar der kezinde evakýatsııalandy. Zardap shekkender joq.
Órttiń shyǵý sebebi ázirge belgisiz.
«Órt oqshaýlandy, úshinshi, ekinshi, birinshi qabatty órtten aman alyp qaldy. Sondaı-aq qazir úıindilerdi alyp tastaý jáne sý tógý jumystary júrgizilýde. Jan-jaqtan tórt jaýynger ýchaske qurylyp, barlyq perımetr boıynsha 14 ámbebap órt sóndirý oqpandary engizildi»,-dedi qalalyq TJD resmı ókili Gúldana Nurymbetova.
Buǵan deıin Almatyda kópqabatty úıden órt shyqqany týraly jazǵan bolatynbyz.
Aıta keteıik, qyzyl jalyndy aýyzdyqtaýǵa 28 tehnıka men jeke quramynan 90 astam adam jumyldyryldy. Oqıǵa ornynda arnaıy shtab quryldy. Sonymen qatar, kóshe tolyq jabyldy.
