Almatydaǵy konferentsııada 5 ınstıtýtsıonaldyq reformany júzege asyrýdyń tujyrymdamalyq negizderi talqylandy
Máslıhatta Elbasy N. Nazarbaev usynǵan bes ınstıtýtsıonaldyq reformany júzege asyrýdyń tujyrymdamalyq negizderi talqylandy.
«Búginde memlekettiń, eldiń birtutastyǵyn saqtaýda Qazaqstannyń tájirıbesi álemdik mańyzǵa ıe bolyp otyr. Memleket basshysynyń qaı kezde de básekege qabiletti, bolashaǵy birtutas ultty qalyptastyrýdaǵy maqsaty - naǵyz azamattyq qoǵam qurý. Onda qazaq ultynan basqa ulttardyń barlyǵy qazaq bolyp ketpeıdi. Olar ózderiniń tilin, mádenıetin saqtaıdy jáne qazaqstandyqtar bolyp atalady. Biraq qazaq ultynyń tóńiregine birigedi. Osy turǵyda Qazaqstan halqy Assambleıasy qurylymynyń mańyzy óte zor. Sáıkesinshe ,tildiń úshtuǵyrlylyǵy saıasaty qazaqstandyqtardy biriktire túsetin kúsh. Til arqyly bilim keledi. Al bilim arqyly halyqtyń ál-aýqaty, áleýmettik-ekonomıkalyq jaǵdaıy jaqsara túsedi», - dedi óz sózinde ál-Farabı atyndaǵy QazUÝ professory, fılosofııa ǵylymdarynyń doktory Marat Hasanov.
Konferentsııa jumysy: «100 qadam - bes ınstıtýtsıonaldyq reformany júzege asyrý jospary», «Qazirgi zamandaǵy biregeıliktiń psıhologııalyq máseleleri», «Ulttyq biregeılik pen Máńgilik el ıdeıalarynyń bilim berý mazmunynda kórinis tabýy», «Qazirgi zamandaǵy etno-dinı jáne mádenı sáıkestendirý», «Qazaqstan jastarynyń qundylyqtary men biregeıligi» taqyryptary boıynsha uıymdastyryldy.
Ál-Farabı atyndaǵy Qazaq ulttyq ýnıversıtetinde ótken búgingi ǵylymı sharaǵa qaladaǵy joǵary oqý oryndarynyń ǵalymdary, oqytýshylary men stýdentteri jáne Almaty qalasy ákimdiginiń ókilderi qatysty.
