Almatydaǵy qonaqúılerdiń birine qaraqshylyq shabýyl jasaldy
ALMATY. 24 tamyz. QazAqparat /Ádilet Musahaev/ - Bul qylmystyq áreket Almatynyń Áýezov aýdanyndaǵy qonaqúılerdiń birinde tańǵa qaraı oryn alǵan.
Kýágerlerdiń aıtýynsha, ǵımaratqa qolynda pyshaǵy bar erkek basa-kóktep kirip, kassada turǵan qyzdan barlyq aqshany berýin suraǵan. Sonymen qatar beıtanystyń qatty mazasyzdanyp, ózin áreń ustap turǵany baıqalǵan.
«Dál osy ýaqytta qonaqúıdiń dálizine jumyspen kelgen azamat qylmyskerge qarsy turýǵa umtylady. Alaıda kúdikti oǵan pyshaqpen umtylyp, ishki qursaǵynyń birneshe jerin jaraqattaıdy. Bul ýaqytta kýágerlerdiń biri tártip saqshylaryna qońyraý shalyp úlgeredi. Birneshe mınýt ótkende bul jerde «Boran» sholǵynshylary kelip qylmyskerdi qarýsyzdandyryp quryqtaǵan», - deıdi Áýezov aýdandyq ІІB-nyń bastyǵy, polıtsııa polkovnıgi Nurlan Almasbekov.
Bul ýaqytta jaraqat alǵan jigitke alǵashqy medıtsınalyq kómek kórsetilip jatqan. Dárigerler oǵan pyshyq jaraqatynan ishki qurylysy búlingen degen dıagnozben qaladaǵy aýrýhananyń birine jatqyzady.
"Dárigerler qansha kúsh salǵanymen 31 jastaǵy jigitti aman alyp qala almadyq, ol sol kúni keshke esin jımastan qaıtys boldy. ІІB-da adam ólimi men qaraqshylyq shabýyl oqıǵasy boıynsha eki qylmystyq is qozǵaldy. Kúdiktige aıyp taǵyldy. Tergeý jumystary onyń basqynshylyq minezin anyqtaý úshin medıtsınalyq mekemelerge suraý salyp, kúdiktiniń psıhologııalyq aýytqýshylyǵy joq ekendigin jáne buryn da tirkelmegendigin anyqtady. Sonymen qatar medıtsınalyq saraptama onyń qylmysqa barǵan kezinde eshqandaı alkogoldi sýsyndy qoldanbaǵandyǵyn aıǵaqtady", - dep atap ótti N.Almasbekov.
Alaıda ustalýshynyń qylmystyq is boıynsha birneshe isi bar ekendigi belgili bolǵan. Sońǵy ret ol qylmystyq jaýapqa qaraqshylyq toptyq shabýyl boıynsha tartylypty. Almatyǵa Qaraǵandydan kelgen bul jigit jazasyn endi temir tordyń arǵy jaǵynda óteıtin bolady.
