Almatydaǵy qonaq úıdegi sábı ólimi: kýáger kórgenin aıtty
ALMATY. QazAqparat - Almatyda 1,5 jastaǵy qyzynyń ólimine kúdikti Ulybrıtanııa azamaty Barakat Mohamedtiń soty jalǵasyp jatyr, dep habarlaıdy QazAqparat tilshisi.
Bes juldyzdy InterContinental qonaq úıinde bolǵan oqıǵa Almatyny dúr silkindirgen bolatyn.
Búgin onlaın sotta qonaq úıdiń aýysym qyzmetiniń basshysy Mádı Álimhanovtan jaýap alyndy.
«24 qazanda jumys kestesine sáıkes men jumysta boldym. Tańǵy 8-ge taman qyzmet telefonyna kúzetshi habarlasyp resepshnge kelýimdi ótindi. Resepshnge kelgende balasyn qushaqtaǵan áıeldi kórdim. Jylap tur eken. Bala kógerip ketken, kózi jumylǵan. Áıel «balamdy urdy, óltirdi» dep aıǵaılap jatty. Men birden qaýipsizdik qyzmeti basshysynyń orynbasaryn shaqyrdym. Resepshnge barlyq qyzmetkerler jınaldy. Odan keıin áıel segizinshi qabatqa kóterilip, 801 nómirge barýymyzdy ótindi», - dedi kýáger.
Onyń aıtýynsha, qyzmetkerler 801 nómirge kóterilgen. Olar kelgende eýropalyq násildi 35-40 jastaǵy er adam vannada jatqan.
«Er adam esin biletin sııaqty kórindi. Biraq, kózi esirtki qabyldaǵan adam sııaqty túpsizdenip turdy. Biz birden nómirden shyǵyp kettik», - dedi ol.
Mádı Álimhanov jedel járdem men polıtsııa qyzmetin kútip alý úshin tómenge túsken.
«Polıtsııamen birge barǵanda álgi adam dálizde jatty. Qolyna kisen salynǵanda ashýlanyp, aǵylshynsha bylapyt sózder aıta bastady», - dedi kýáger.
Aıta ketý kerek , keleńsiz jaǵdaı 2019 jyly 24 qazanda bolǵan edi.
Almatydaǵy InterContinental qonaq úıinde 1,5 jastaǵy Sofııa Barakat esimdi sábı kóz jumǵan bolatyn.
Polıtsııa kúdikti retinde onyń ákesi Barakat Mohammedti ustady.
