Almatydaǵy kólik oqıǵasy: prokýror aǵaıyndylardy 15 jylǵa sottaýdy surady
ALMATY. QazAqparat - Almaty qalasynyń qylmystyq ister jónindegi mamandandyrylǵan aýdanaralyq sotynda jaıaý júrginshilerdi kóligimen qasaqana qaqqan aǵaıyndylardyń isi boıynsha jaryssóz ótti, dep habarlaıdy QazAqparat tilshisi.
«Men sottan Jandos Álikeevti 15 jylǵa bas bostandyǵynan aıyrýdy suraımyn»,– dedi prokýror.
Memlekettik aıyp taǵýshy Dinmuhammed Álikeevke de sonsha jyl surady.
Esterińizge salaıyq, 26 tamyzda tańǵy saǵat 5-te Almaty qalasy Bostandyq aýdany Gagarın kóshesinde bolǵan qaqtyǵystan keıin bir taraptyń ókilderi óz qarsylastaryn avtomobılmen qaǵyp, qylmys ornynan boı tasalaǵan. Vıdeo áleýmettik jelide taraǵan bolatyn.
Keıinnen polıtsııa adamdardy qaqqan kólikterdi taýyp, tárkiledi. Eki kólik aıǵaq zat retinde QR QK-niń 24-baby 3-bóligi jáne 99-babynyń 2-bóligi boıynsha qozǵalǵan qylmystyq is materıaldaryna tirkeldi.
Sodan keıin, kúdiktilerdiń aǵaıyndy ekeni anyqtaldy. Olardyń anasy uldarynyń mundaı qadamǵa ózderin qorǵaý úshin barǵanyn alǵa tartty.
Polıtsııa 27 tamyzda 1995 jyly týǵan Jandos Álikeevti ustady. Al ekinshi kúdikti 16 qyrkúıek kúni ustaldy. Ol Almaty oblysynyń aýmaǵynda polıtsııadan jasyrynyp júrgen.
Buǵan deıin, sotta eki jábirlenýshi sottalýshylarǵa qarsy eshqandaı shaǵymdary joq ekenin aıtqan.
