Almatydaǵy kólik qurastyratyn zaýyt 45 myń temir tulpar shyǵarmaq
ALMATY. QazAqparat- Byltyr Hyundai Trans Kazakhstan jeńil avtomobıl zaýyty 26 myń avtokólik shyǵaryp, el bıýdjetine 9,4 mlrd teńge salyq aýdardy, dep habarlaıdy QazAqparat tilshisi.
Erbolat Dosaev Hyundai Trans Kazakhstan jeńil avtomobıl shyǵaratyn zaýyttyń jumysymen tanysty.
Kásiporynda iri torapty jáne usaq torapty qurastyrý, shanaqty dánekerleý, lak-boıaý jabynyn jaǵý, ıntererdi ornatý jáne qurastyrý boıynsha óndiristik protsess jolǵa qoıylǵan.
Byltyr zaýyt 26 myń avtokólik óndirip, el bıýdjetine 9,4 mlrd teńge salyq aýdardy. Bıyl kásiporyn tolyq qýattylyqqa shyǵyp, 45 myń avtokólik shyǵarýdy kózdep otyr.
Qala basshysyna avtokomponentter shyǵaratyn zaýyttyń jobasy tanystyryldy. Jańa kásiporyn oryndyqtardy, avtokólikterge arnalǵan plastıkalyq bólshekter men aksessýarlardy, sondaı-aq mýltımedııalyq júıelerdi shyǵarady.
Zaýyt qurylysy bıylǵy jyldyń kúzine josparlanǵan. Kompanııa taǵy bir avtomobıl zaýytyn salý jáne shanaq bólshekterin shtamptaý óndirisin iske qosý josparlary týraly atty. Kásiporyn óndiristi lokalızatsııalaýdy arttyrýǵa nıetti.
Aıta keteıik, 2017 jyly salynǵan «Indýstrıaldy» temirjol stantsııasyn sostavtardyń joıylý qaýpine baılanysty kóliktik baqylaý ınspektsııasy jaýyp tastaǵan. Taǵy bir nysan – kirme temirjoldar 2018 jyly aqaýlarymen qabyldandy.
Qala basshysy temirjol stantsııasy men joldardyń qurylysy turǵyndar úshin tıimdi logıstıkany qamtamasyz etip, olar óndiretin ónimniń ózindik qunyna oń áser etýi tıis ekenin jetikzdi.
Sonymen qatar, ol stantsııa men kirme joldardy paıdalanýǵa berý úshin qajetti jumystardy aıaqtaýdy, sondaı-aq olardy qabyldaýdyń aqaýly faktilerin aǵymdaǵy jyldyń 30 qazanyna deıin muqııat sheshýdi tapsyrdy.
Almaty ákimi sondaı-aq 2018 jyly salynǵan, biraq paıdalanýǵa berilmegen nóser (jańbyr) káriziniń jumys istemeıtin júıesimen tanysty.
Qala basshysy qala ákimdiginiń ýákiletti basqarmalaryna merdiger uıymnyń mindettemelerine tekseris júrgizip, materıaldardy quqyq qorǵaý organdaryna berýdi tapsyrdy.
«Biz jaýapsyz merdigerdiń máselesin anyqtaımyz, biraq qazir bizge nóserlik káriz júıesin retke keltirip, ony ónerkásiptik paıdalanýǵa berý mańyzdy», – dedi ol.
Qazirgi ýaqytta №12 qosalqy stantsııa ǵımaraty jóndeýdi qajet etedi, onyń tirek konstrýktsııalarynda topyraqtyń túsýine baılanysty jaryqtar paıda bolǵan, búginde jóndeý-qalpyna keltirý jumystaryn júrgizý kerek.
Erbolat Dosaev olardy aǵymdaǵy jyldyń qyrkúıegine deıin aıaqtaýdy tapsyrdy.
Almaty ákimi óńirlik úılestirý keńesi músheleriniń, ındýstrıaldy aımaqtyń jumys istep jatqan jáne áleýetti rezıdentteriniń qatysýymen keńes ótkizdi. Búginde ındýstrıaldy aımaqta qyzmet kórsetetin kompanııalardyń fýnktsııalaryn birden eki kompanııa oryndaıdy - bul «Almatyny ındýstrıaldy aımaǵy» JShS jáne «AIA ınfraqurylym operatory» JShS.
«One – stop – shop» prıntsıpi boıynsha ınvestorlardyń jumysyn jeńildetý úshin «Almatynyń ındýstrıaldy aımaǵy» JShS atynan bir ýákiletti operatordy qaldyrýdy tapsyramyn, ózgege berilgen fýnktsııalar men aktıvterdi kompanııaǵa qaıtarý qajet. Osy naqty jaǵdaıda bir operator ındýstrıaldy aımaqty damytý jáne qoldaý maqsatynda jumys isteıtin bolady», – dep atap ótti Erbolat Dosaev.
Keńes barysynda ındýstrıaldy aımaqtyń aýmaǵyn keńeıtý, bir bilim berý klasteri bazasynda kadrlar daıarlaý, sondaı-aq qala turǵyndaryn kásiporyndarǵa jumysqa ornalastyrý máseleleri talqylandy.
Bıyl jalpy somasy 13,3 mlrd teńge bolatyn 13 jobany iske asyrý josparlanǵan, al 2025 jylǵa qaraı óndiristik úı-jaılardyń jalpy aýdany 250 myń sharshy metr bolatyn taǵy 40 óndiristik parkti paıdalanýǵa berý kózdelgen.
