Almatydaǵy qısaıǵan úı boıynsha zertteý nátıjeleri shyqty
ALMATY. QazAqparat – Almaty qalasy ákiminiń orynbasary Muhıt Ázirbaev «Zerdeli–6» shaǵyn aýdanynda qısaıǵan kópqabatty úıdiń turǵyndarymen kezdesti, dep habarlaıdy QazAqparat tilshisi.
«Zerdeli– 6» shaǵyn aýdanyndaǵy №179 úıdiń turǵyndarymen ótken kezekti kezdesý barysynda QazQSǴZI-nyń zertteý nátıjeleri jarııa etildi.
2019 jyldyń sońǵy aılarynda bastalǵan úıdiń negizi men tirek konstrýktsııalaryn júıeli túrde zertteý, ǵımarattyń kún saıynǵy qısaıýyn ólsheý jáne onyń múmkin bolatyn serpinin qadaǵalaý QazQSǴZI zerthanasynyń mamandaryna osy úıde turý qaýipsizdigine qatysty aldyn ala qorytyndy berýge múmkindik berdi. Mamandardyń málimeti boıynsha, qalpyna keltirý jumystary aıaqtalǵannan keıin úı odan ári paıdalanýǵa jaramdy bolady.
Osy jyldyń aqpan aıynda QazQSǴZI AQ-nyń qorytyndysy men usynymy negizinde qurylys-montaj jumystaryn bastaý josparlanyp otyr. Onda qarama-qarsy jaǵynan topyraqty alý arqyly úıdiń qısaıýyn joıý boıynsha jumystar júrgizilmek. Odan ári úıdiń irgetas taqtasyna baılanystyra otyryp, úı perımetri boıynsha býrabıvti qadalar ornatý arqyly úıdi tiktep nyǵaıtý boıynsha jumystar júrgiziledi. Odan keıin sý burý júıesiniń qurylǵysymen qalpyna keltirý jumystary qolǵa alynady.
«Qazir usynystar boıynsha QazQSǴZI-men kelise otyryp, jumys óndirisiniń jobasy ázirlenbek. Ǵımarattyń irgetasyn kúsheıtý, qısaıýdyń aldyn alý jáne joıý jónindegi odan arǵy barlyq jumystar QazQSǴZI-diń qurylys salasyndaǵy, onyń ishinde seısmıkalyq qaýipti aımaqtardaǵy problemalarmen aınalysatyn Qazaqstandaǵy jalǵyz memlekettik mekemeniń baqylaýymen júrgiziletin bolady. Instıtýttyń bul salada 87 jyldyq tájirıbesi bar», — dep atap ótti Almaty qalasynyń jaıly qalalyq orta basqarmasynyń basshysy Qýandyq Aıtmaǵanbetov.
Mamandardyń pikirinshe, qısaıǵan úıdiń barlyq problemalaryn túpkilikti sheshilýine kóz jetkizbeıinshe, bul jumystar úsh aıǵa deıin sozylýy múmkin. Sonymen qatar, Zerdeli yqsham aýdanyndaǵy barlyq 32 úı boıynsha zertteý júrgizilip, QazǴZI-diń usynymdary shyqpaq.
Qazirgi ýaqytta barlyq turǵyndar qala ákimshiligi esebinen jalǵa beriletin turǵyn úımen qamtamasyz etilgen. Adamdarǵa balalaryn balabaqshalar men basqa da bilim berý mekemelerine ornalastyrýǵa kómek kórsetilýde.
Osy ýaqyt aralyǵynda turǵyndar arasynda týyndaǵan barlyq máselelerdi sheshý úshin arnaıy shtab qurylyp, jumys isteýde.
