Almatydaǵy kilem tóselgen avtoturaǵy bar meıramhananyń ıesi - ázilkesh Svetlakov
ASTANA. QazAqparat - Almatyda kilem tóselgen avtoturaǵy bar biregeı meıramhana ashyldy. Ideıa avtory jáne meıramhananyń qojaıyny - tanymal reseılik shoýmen ári akter Sergeı Svetlakov, dep jazady «Ekspress-K».
Meıramhananyń art-dırektory Evgenıı Vaıgandt basylym redaktsııasyna avtoturaqqa kilem tóseý ıdeıasyn Svetlakov usynǵanyn aıtqan. Aıta keterligi, dál osyndaı meıramhana Kıevte de bar eken. Eki qalada da meıramhanaǵa kelgen qonaqtar mundaı jańashyldyqqa tań-tamasha bolyp jatqan kórinedi.
«Meıramhana aldyna qyzyl túsi qanyq kólemi 3-te 4 metrdi quraıtyn shamamen 15 klassıkalyq kilem tóselgen. Bastapqyda qonaqtar mundaı standarttan tys turaq ornyna kólikterin qoıýdan qorqaqtaǵan bolatyn. Olar kilemderdi jýǵannan keıin keptirýge tósep qoıǵan dep oılaǵan eken. Al bul ádeıi tóselgenin bilgennen keıin qýandy. Al ǵalamtordaǵy pikirler kóńil qýantarlyq emes. Adamdar bul kilemderdi odan da balalar úıine sadaqaǵa bergenimiz durys dep sanaıdy. Qara pıar - bul da pıar ǵoı», - dedi E.Vaıgandt.
Onyń atap ótýinshe, bul kilemder jyl boıy meıramhana aldynda tóseletin bolady. Al laısańdy kúnderi búlingen kilemder tyńǵylyqty tazalanyp otyrady.
