Almatydaǵy keıbir blokpostty atty patrýl baqylaıdy
ALMATY. QazAqparat – Karantın perımetriniń qol jetimsiz jerlerin Almaty polıtsııasy atpen júrip baqylaıdy, dep habarlaıdy QazAqparat tilshisi.
Jalpy, Almaty qalalyq PD qurylymynda qalanyń ereksheligi men ınfraqurylymy eskerilip atty bólimder qarastyrylmaǵan. Alaıda tótenshe jaǵdaıǵa baılanysty polıtsııa qyzmetkerleri atpen patrýldeýge shyqty.
«Ádette, atty patrýlder kópshiliktiń belsendi qoldaýymen uıymdastyrylady, ıaǵnı polıtsııaǵa jylqylardy tegin beretin azamattardyń kómegi arqyly. Bizde kólik óte almaıtyn jerler bar. Sondyqtan atty patrýlder shyqty. Búgingi tańda bul jumys Alataý aýdanynyń «Rahat» jáne «Mádenıet» shaǵyn aýdandary sııaqty shalǵaı eldi-mekender aýmaǵynda júrgizilip jatyr. Osy aýyldar arqyly, siz, Almaty oblysynyń aýmaǵyna kirý úshin kedergilerdi aınalyp óte alasyz, osyǵan baılanysty aınalma joldarda qorǵanys beton plıtalary ornatylyp, at patrýlderi uıymdastyrylǵan. Polıtsııa qyzmetkerleri zańdylyq pen tártipti qadaǵalaıdy», – dedi Alataý aýdandyq polıtsııa basqarmasynyń basshysy Ulan Ábilqaıyr.
