Almatydaǵy kesilgen aǵashtar: Qylmystyq is prokýratýraǵa joldandy

ALMATY. QazAqparat - Almaty polıtsııasy «Sulpak» dúkeniniń janyndaǵy aǵashtardy kesý faktisi boıynsha qozǵalǵan qylmystyq istiń aıaqtalýyna qatysty túsinikteme berdi, dep habarlaıdy QazAqparat tilshisi.

Esep berý kezdesýi barysynda, turǵyndar Baqytjan Saǵyntaevtan «Sulpak « dúkeniniń janyndaǵy aǵashtardy keskender qandaı jaýapqa tartylǵanyn surady.

Bul saýalǵa Almaty qalasynyń Polıtsııa departamenti basshysy Qanat Taımerdenov jaýap berdi.

«Bul fakt boıynsha biz tergeý protsesin aıaqtadyq. Іs QRQK 300 baby boıynsha qaraldy. Qazirgi ýaqytta qylmystyq is prokýratýraǵa joldandy»,- dedi ol.

Eske sala ketsek, 23 qarashaǵa qaraǵan túni Almatyda saýda úıiniń janynda (Áýezov-Tóle bı kósheleriniń qıylysy) jaıqalǵan emen men qaraǵash otaldy. Buǵan qatysty turǵyndar áleýmettik jelide narazylyq bildirdi.

Prezıdent Qasym-Jomart Toqaev Almaty qalasy Tóle bı kóshesindegi aǵashtardyń otalǵanyna qatysty jaǵdaıǵa nazar aýdardy.

Memleket basshysy Almaty ákimi Baqytjan Saǵyntaevqa atalǵan jaǵdaıǵa baılanysty qyzmettik tekserý júrgizip, kinálilerdi jaýapkershilikke tartýdy tapsyrdy.