Almatydaǵy QazUAÝ-de 7- qysqy Azıada chempıondarmen kezdesý ótti
ALMATY. 11 aqpan. QazAqparat /Ádilet Musahaev/ - Búgin Almatydaǵy Qazaq ulttyq agrarlyq ýnıversıtetinde 7-qysqy Azııa oıyndarynda tuǵyrdan sekirýde chempıon atanǵan Evgenıı Levkın men kúmis júldeniń ıesi Alekseı Korolevpen kezdesý ótip, olardyń qurmetine kontsert uıymdastyryldy.
Jıyn barasynda qonaqtar jetken jetistikteri jaıynda baıandap, aldaǵy josparlary men elimizdegi sportty damytý jónindegi oılarymen bólisti.
«Bul oıyndarǵa kóp daıyndalyp, jattyǵýlar jasadyq. Eńbegimiz esh ketpeı, úlken jetistikterge qol jetkizdik. Elimizdiń Ánurany shyrqalǵanda ózińniń abyroıly óner kórsete bilgenindi sezine túsedi ekensiń», -deıdi E.Levkın.
Ýnıversıtettiń tárbıe isi jáne qoǵammen baılanys departamentiniń dırektory Baýyrjan Imanǵalıevtyń aıtýynsha, búgingi aktsııalyq jıynnyń maqsaty - jastardy sportqa baýlyp, patrıottyq rýhta tárbıeleý. «Árbir jas eline, Otanyna degen súıispenshiligin arttyryp, elimizdiń mártebesin kótere túsýi kerek», -deıdi ol.
Almaty qalasy boıynsha atalǵan joǵary oqý orynnan 600 erikti Azıadaǵa qyzmet etti.
Almaty qalasy jastar saıasaty basqarmasynyń basshysy Bahtııar Máken ýnıversıtet atynan eriktiler qatarynda bolyp, úlken mańyzdy sharaǵa úles qosqandary úshin óziniń alǵysyn bildirdi. «Búgingi jıynda qala ákimi Ahmetjan Esimov jastarymyz salaýatty ómir saltyn qalyptastyryp, aldaryna naqty maqsat qoıa bilsin degen oımen qaladaǵy ár oqý ornynda sportshylarmen kezdesýler ótkizýdi tapsyrdy», -deıdi B.Máken.
