Almatydaǵy Qazaq ulttyq medıtsına ýnıversıtetinde «Ýnıversıtet kúnderi» atalyp ótilýde
ALMATY. Jeltoqsannyń 2-si. QazAqparat /Ádilet Musahaev/ - Búgin Almatyda S. Asfendııarov atyndaǵy Qazaq ulttyq medıtsına ýnıversıteti «Ýnıversıtet oqýlary» aıasynda halyqaralyq ǵylymı-teorııalyq konferentsııa ótkizip jatyr,
dep habarlaıdy QazAqparat.
Sharanyń negizgi taqyryby - qazirgi álemdegi kardıologııanyń ózekti máseleleri bolyp otyr. Konferentsııaǵa Reseı, Germanııa jáne Qyrǵyzstannan professorlar kelip, «Kardıologııanyń zamanaýı aspektileri: Dıagnostıka jáne emdeý», «Kardıovaskýlıarlyq júıe patalogııalarynyń nýtrıtsıonaldi aspektileri», «Júrek-qantamyr júıesi aýrýlary-psıhosomatıkalyq aýrýlar», «Orta Azııadaǵy kardıologııanyń búgingi problemalary» taqyryptarynda baıandamalar oqyp, ózderiniń tájirıbelerimen bólisti.
«Bizdiń oqý ornymyzdyń tarıhy - 1930 jyly 2 jeltoqsan kúni S.J. Asfendııarovtyń «Qazaq memlekettik medıtsına ınstıtýtynyń dırektory» qyzmetine taǵaıyndalǵanynan bastalady. Ol kezde 2-3 adam bolyp bastalǵan ýnıversıtet búgin úlken oqý ordasyna aınalyp otyr. Byltyrdan bastap osyndaı keń kólemdi konferentsııa uıymdastyryp otyrmyz, oǵan 9 memleketten áriptesterimiz kelip otyr» deıdi ýnıversıtet rektory Aıqan Aqanuly. Sonymen qatar ol qazirgi ýaqytta ýnıversıtette 10 myń stýdent bilim alyp jatqandyǵyn, 150-deı professor jáne jalpy 1500-daı oqytýshylar qyzmet etip jatqandyǵyn jetkizdi.
Bul shara jeltoqsannyń 4-ine deıin jalǵasyn tappaq. Oǵan Qazaqstannyń barlyq medıtsına oqý oryndarynyń, oblystyq densaýlyq saqtaý basqarmalarynyń, jetekshi ǵylymı-zertteý ınstıtýttarynyń jáne medıtsına uıymdarynyń basshylary men stýdentter qatysýda.
