Almatydaǵy kásipqoı boks keshinde birqatar qazaqstandyq rıngke shyǵady

ALMATY. QazAqparat – 27 aqpanda Almatyda MTK Fight Night kásipqoı boks keshi ótedi, dep habarlaıdy QazAqparat tilshisi.

Boks keshin álemdegi kásipqoı boksshylardy ilgeriletý jónindegi uıym sanalatyn MTK Global menedjerlik kompanııasy MTK Kazakhstan fılıalymen jáne TOP Rank promoýterlik kompanııasymen birge ótkizedi. Basty jekpe-jekte sharshy alańǵa Qazaqstan ulttyq quramasynyń kapıtany Qamshybek Qońqabaev (2-0, 2KO) shyǵady. Onyń qarsylasy – ulybrıtandyq Stıven Ýord. Boxrec.com álemdik statıstıkalyq portalynyń nusqasy boıynsha aýyr salmaqtaǵy boksshylardyń jahandyq reıtınginde 86-orynda turǵan brıtandyq kásipqoı sharshy alańda óziniń jarqyn jekpe-jekterimen jankúıerleriniń esinde.

Sonymen qatar qazirgi ýaqytta AQSh-ta turyp, tyńǵylyqty jattyǵyp jatqan Qazaqstan boksshysy Jánibek Álimhanuly da Almatydaǵy kásipqoı boks keshinde óner kórsetedi. Jánibektiń qarsylasy taıaý kúnderi belgili bolmaq.

Munan bólek, dál osy kúni MTK Kazakhstan menedjerlik kompanııasy atynan kásipqoı sharshy alańda óner kórsetetin Abaı Tólesh, Talǵat Shaıken, Álı Baloev, Nurdos Tólebaı, Nurtas Ájbenov, MTK Global Kazakhstan Golden Contrast aýqymdy jobasynyń jeńimpazdary Torǵynbek Ámirovpen Nurbol Sultanbaı jekpe-jekke shyǵady.

Koronavırýs ınfektsııasynyń taralýyna baılanysty kórermensiz ótetin kásipqoı boks keshin ESPN telearnasynyń jáne brıtandyq «IFLTV» strımıngtik tuǵyrnamanyń tikeleı efırinen tamashalaýǵa bolady.